شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5496 روچ سرجم بوتگ۔ یک شمبے ءِ روچ ءَ بلوچ یکجھتی کمیٹی ءِ سروک سبگت اللہ شاہ جی ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ راج ءِ ھک ءِ جھد دراجکش اِنت۔ ھپتاد ءِ دھک ءَ سدانی کچ ءَ بلوچ پاکستانی لشکر ءَ آوار جتگ ءُ بیگواہ کرتگ اَنت۔ آ وھد ءَ بلوچ ءِ کر ءَرسانکدر ءُ سیاسی مھکمی ءِ نہ بوگ ءِ سوب ءَ کیس یاداشت نہ بوتگ اَنت۔ دو ھزار ءَ پد بلوچ پسگانی جھد ءَ سیاسی زانشت وھد ءَ ھساب ءَ گیش بوتگ۔
ماما کدیر گوشتگ کہ اے کرن ءِ بندات ءَ بلوچ پسگانی پاکستانی لشکر ءِ دست ءَ آوار جنگ ءُ پد ءَ آیانی دزگیری ءِ پدر نہ کنگ میان استمانی مردمی آمیدگسی راھبند ءِ بگیری برجاہ اِنتءُ ھزارانی کچ ءَ پسگانی ژانگولیں لاش دزکپتگ اَنت۔ ریاست ءَ پہ زوراکی ھچ راہ پشت نہ گھتگ۔ بلے بلوچ ءَ پہ وتی آزیزانی پدجنگ ءَ ایمنیں جھد ءِ سوڑگ کرتگ ءُ زورگر ءِدرسیں پندل بے سو ب کرتگ اَنت ءُ گل ءِ راھبند ءِرد ءَ وتی جھد برجاہ داشتگ۔ مرچی ھزارانی کچ ءَ بلوچ پسگ پاکستانی لشکر ءِ دست ءَ زور بیگواہ کنگ بوتگ آیانی گواہ ساڑی اَنت۔ پاکستان ءِ آمیدگس ھم سرپد اِنت ءُ مردمی ھکانیادارہ بے توار اَنت۔
آئی ءَ گوشتگ کہ وی بی ایم پی ءِ گوستانکی جھد ھمک ھما ادارھانی در ءِ ٹکگ ءَ چک ءُ پد نہ بیت کہ آ مردمی ھکانی ٹاپار ءَ جن اِنت۔ دراجکش ءُ پرایمنیں جھد پہ بلوچ پسگانی آجوئی ءَ جوانیں گامگیجے۔ زور بیگواھیں مردمانی کھولانی اے گوستانی شدکشیں بنجل ءَ جھان ءِ ھمک جاہ ءَ بلوچ راج ءِ بگیری ءَ پاکستان ءِ زوراکیانی توار سر کرتگ۔ اگاں میان استمان ءِ بے تواری برجاہ بہ بیت گڑا جھان بلوچ چکچینی ءَ یک وڑ ءَ شریدار بیت۔
