ھزدار: زوربیگواھیں سلمان بلوچ ءِ گھار سادیہ بلوچ ءَ وتی درشانے ءَ گوشتگ کہ منی برات سلمان بلوچ ءِ زوربیگواھی ءَ مئے کھول رنجانی دیمپان اِنت۔
سادیہ بلوچ ءَ گوشتگ کہ منی برات سلمان بلوچ سیزدہ نومبر 2022 ءَ چہ شال ءَ زوربیگواہ کنگ بوتگ۔ ما زوربیگواھیں مردمانی کمیشن ءُ مزن آمیدگس ءَ ھوار درسیں راھبندی ءُ کانودی پورم ءَ شُتگ ایں بلے مارا ھچ جاہ ءَ انساپ نہ رستگ۔ ریاستی آمیدگسی نزام کہ آ پہ بے میاریں مردمانی انساپ دیگ ءَ جوڑ کنگ بوتگ بلے آ ھم زوراکاں کمک کنگ ءَ اِنت۔
آئی گوشتگ کہ سلمان بلوچ ءِ وڑیں زانتکاریں بلوچ ورنایانی بے میار ءَ ابید چہ آمیدگس ءِ پیسلہ ءَ زوربیگواہ کنگ نہ تھنا راھبند ءِ آرٹیکل نُھ ءُ دہ ءِ تچک ءَ بگیری اِنت بلکیں اے کانود ءِ واک ءِ سر ءَ اُرش کنگ اِنت۔
سادیہ بلوچ ءَ گوشتگ کہ بلوچ ورنا راج ءِ پجار، زانت ءُ دیمروئی ءِ چراگ اَنت آیانی زوریں بیگواھی پہ سرجمیں راج ءَ ٹوھیں تاوانے۔ سلمان بلوچ ءَ ھوار آدگہ ورنایانی زوربیگواہ بوگ زانشت ءِ دارگ ءِ یک مھکمیں شوربندی یے ءِ درچ اِنت۔
آئی گوشتگ کہ اگاں انساپ ءِ لوٹگ، آمیدگساں روگ ءُ راھبند ءِ رد ءَ وتی بیگواھیں آزیزانی آجوئی ءِ لوٹ کنگ میار یا ڈیھ ءِ دژمنی یے گڑا اے ریاستی نزام وتی راھبند ءِ بگیری ءَ کنگ ءَ اِنت۔ زوربیگواھیانی بگیری ءَ جھد تھنا یک کھولے ءِ نہ اِنت بلکیں سرجمیں چاگرد ءِ مچی زمہ واری اِنت۔ دانکہ شھری پھریز مہ بنت، انساپ تھنا یک ٹاپارے ءُ کانود تھنا یک کتابے پش کپ ایت۔
