تربت: زور بیگواھیں مردمانی کھولانی نیمگ ءَ شھید پدا اھمد چاراہ ءَ مرچی سے روچ اِنت کہ زھرشانی نندانک برجاہ اِنت۔ زھرشانی ءَ مردماں بازیں کچے ءَ بھر زرتگ ءُ نشتگ اَنت۔
اھوالکار ءِ رد ءَ اے وھد ءَ چہ بلیدہ ءَ پاکستانی لشکر ءِ دست ءَ زور بیگواہ کنگ بوتگیں مسلم آرپ، پتہ میار ءُ جان مھمد، چہ آپسر ءَ زور بیگواھیں جھانزیب، پیدراک ءِ جاہ منند سمیر ءُ میران ءِ کھول ءَ ھوار نسار کریم ڈاکٹر رپیک مراد زھرشانی نندانک ءَ ساڑی اَنت۔
چہ زور بیگواھیں مردمانی کھولاں ابید نودربر گل، سیاسی ءُ چاگردی کارکناں ھوار لس مردماں بازیں کچے ءَ بھر زرتگ۔
بیگواھیں مردمانی کھولانی گوشگ اِنت دانکہ مئے زور بیگواھیں آزیز آجو نہ بوتگ اَنت ما وتی زھرشانی نندانک ءَ برجاہ دار ایں۔ آئید ءِ موکلاں پد ما وتی زھرشانی نندانک ءَ سرکاری کارگسانی دیم ءَ بر ایں۔
سے روچ ءِ گوزگ ءَ پد ھم چہ سرکار ءِ نیمگ ءَ پہ زور بیگواھیں مردمانی کھولانی لوٹانی منگ ءَ ھچ وڑیں دلجمیں گامگیج زورگ نہ بوتگ۔
