بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ جون 2024 ءِ بیگاہ ءِ ھپت ءَ تربت, کیچ ءِ ھند کلاتک مرمر کراس ءَ سرمچار گل ءِ کارے ءَ روگ ءَ بیتگ اَنت کہ گوں پاکستانی لشکر ءِ جوڑ کنگ بیتگیں کشندہ ٹولی ءِ کارمنداں میڑے بیتگ،کشندہ ٹولی ءِ کارمنداں سرمچارانی انگِر کنگ ءِ جُھد کُرتگ کہ ھمے میان ءَ سرمچار مھمود پنام مھروان دژمن ءِ انگِر ءِ پروشگ ءَ گوں جوانمردی ءَ جنگ داتگ ءُ شھید بیتگ، آئی ءِ ھمراھیں سرمچار دژمن ءِ انگِر پروشگ ءَ سوبین بیتگ۔ ھمبلیں سرمچار ءَ پہ تھمبل،جوانمردی ءُ گوں گھتریں چیرجنگی کارشونیاں شھیدیں سرمچار ءِ سلاہ ءُ آدگہ سامان زُرتگ اَنت ءُ دراھگ ءَ سوبین بیتگ۔
آئی ءَ گوشتگ کہ شھید بیتگیں جوانمردیں سرمچار مھمود پنام مولابکش جھمنند ھسادیگ دشت چہ 2012 ءَ پہ راجی آجوئی ءِ جُھد ءَ گوں بی ایل ایپ ءَ ھوار بیتگ۔آئی دژمن ءِ بگیری ءَ بازیں جنگاں گوں ھمبلاں ھمکوپگ بیتگ، گوں جوانمردی ءَ جنگے داتگ ءُ چیرجنگی ءِ بازیں درورے جوڑ کُرتگ۔
جارکش ءَ گوشتگ کہ شھید مھمود جان پنام مھروان سرمچار شھید ناکو ایسا پنام ناکو شیرا، شھید سمیر پنام سوگات، شھید سنا پنام سوگات ءُ شھید جاپر پنام سنا ءِ نزیکیں سیاد بیتگ۔
آئی گوشتگ کہ شھید مھمود پنام مھروان یک مھروان، ھمدردیں ھمبل ءُ یک دلجم ءُ جپاکشیں سرمچارے بیتگ، سلاہ بندیں جُھد ءَ پیش آ بلوچستان ءِ آجوئی ءَ راجداری جُھد ءَ بندوک بیتگ، سال 2012 آ بی ایل ایپ ءِ شھری نٹورک ءَ ھوار بیتگ، چہ ھما روچ ءَ آ بی ایل ایپ ءِ گیشتگیں راہ ءَ یک پُرکاریں سرمچارے بیتگ ءُ شھیدانی کاروان ءَ ھوار ءُ نمیران بوت۔
جارکش ءَ گوشتگ کہ کشندہ ٹولی ءِ دُرسیں کارمند زانگ بیتگ اَنت ءُ زوت دُرس نشانگ کنگ بنت،بلوچ راجی آجوئی زْرمبشت ءِ بگیری ءَ پُرکاریں راجی دژمن ھچ وڑ ءَ پھل کنگ نہ بنت۔
میجر گھرام ءَ گوشتگ کہ بی ایل ایپ وتی ھمبلیں سرمچار شھید مھمود جان پنام مھروان ءَ پہ آئی ءِ گرانبھائیں شھیدی ءَ ستاشانی ندر کنت ءُ کول کنت کہ شھیدانی لوٹ ءُ واھگاں ھرچ پیم ءَ آسر ءَ سر کن ایں ءُ آیانی بلوچستان ءِ آجوئی ءِ واب سرجم کنگ بیت۔
