پنجگور: زور بیگواھیں زاھد ھسین ءِ کھول ءَ پریس کانپریس کرتگ ءُ گوشتگ کہ زاھد ھسین یک پرایمنیں شھرمنندے ءُ آ در سرکاری بینکے ءَ پھازدار بوتگ ءُ 9 مئی ءَ بیگاہ ءِ شش ءَ موکل ءَ پد گس ءَ سربوتگ ھمے میان ءَ سادگ پوشاکیں سلاہ بندیں مردم گس ءَ پترتگ اَنت آوار جتگ ءُ گوں وت برتگ اِتگ اش ۔ ما جست گپت شما کے اِنت ءُ ایشی ءَ کج ءَ بر اِت؟ گڑا آیاں گوشتگ کہ پہ جست ءُ پرس ءَ شال ءَ برگ ءَ ایں ءُ رند ءَ یل کنان ئے انگت ءَ مئے زھگ نہ یل کنگ بوتگ ءُ نہ ھالے مارا سر بوتگ۔
آئی ءَ گوشتگ کہ چہ ایشی ءَ پد آئی کسان کسانیں زھگ ءُ ما پیریں مات ءُ پت، گھار ءُ براتاں ھوار تیوگیں کھول سکا رنجانی دیمپان ایں ءُ مئے زند چون مھشر ءَ اِنت۔ مردمگری ءِ بنیاد ءَ منی زھگ ءَ آجو بہ کناھین اِنت۔
آئی ءَ گوشتگ کہ ما گوں بلوچستان ءِ مزن وزیر، آئی جی بلوچستان، مکران ءِ دمگدار ءُ لشکری ادارھانی گون ءَ لوٹ کن ایں کہ زاھد ھسین ءَمردمگری ءِ بنیاد ءَ یل بہ کن اَنت اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔ ما دلجمیں مئے زھگ بے میار اِنت آ یک درسرکاری بینکے ءِ پھازدار بوتگ۔
آئی ءَ گوں مردمی ھکانی ادارھاں لوٹ کرتگ ءُ گوشتگ کہ آ اے جیڑہ ءِ باروا توار چست بہ کن اَنت، اگاں مئے لوٹ منگ نہ بوت اَنت ءُ زاھد آجو کنگ نہ بوت گڑا ما لاچار بہ ایں ءُ دمگدار ءِ کارگس ءُسی پیک ءَ زھرشانی ءَ نند ایں۔
