شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5469 روچ سرجم بوتگ۔ سے شمبے ءِ روچ ءَ سیاسی ءُ چاگردی کارکن، بلوچ وتن پارٹی ءِ سروک ھیدر رئیسانی، سلمان، اباس، وکیل ءُ آدگہ مردم پہ ھمدردی درشاں کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ درسیں بیگواھیں مردمانی یل نہ کنگ ءِ باروا ءَ پاکستان ءِ زورگری ءُ رستریانی بگیری ءَ ما وتی توار ءِ داں جھان ءَ سرکنگ ءَ سوبین بوتگ ایں۔ زوربیگواھیں مردمانی یل نہ کنگ ءِ باروا جھان ءِ بے تواری زورگر ءِ نپاں گیشتر کمک کنت۔ بلوچ زور بیگواھیں مردمانی ژانگولیں لاشانی چگل دیگ ءُپاکستان ءِ زورگری ءِ پژدر ءَ ایمنیں جھد کنگ ءَ اِنت۔
آئی ءَ گوشتگ کہ کشت ءُ کوش ءِ دارگ ءَ ابید پہ مردمگری ءِ ٹاپار جنوک پاکستان ءِ لشکری، مالی ءُ ٹیکنالوجی ءِ سامان ءِ دیگ زورگری ءِ تب ءَ پیش دارگ ءَ اَنت۔ زورگریں پاکستان ءِ نیمگ ءَ بلوچ ءِ پرایمنیں جھد کنوکانی آوار جنگ ءُ رستری سزا دیگ، لاشانی چگل دیگ ءَ ابید بلوچ ءِ ایمنیں جھد ھلاس نہ بوگ ءَ پد زورگر وتی شونداتانی رد ءَ جتائیں زوراکیاں چکاسگ ءَ اِنت۔ بلے شھید ءُ جھدکارانی گرانبھائیں دیمونیاں زورگر ءِ ھمک زوراکی بے سوب کرتگ۔
ماماکدیر گوشتگ کہ ریاست ءِ نیمگ ءَ بلوچانی لاشانی چگل دیگ ءِ درچ برجاہ اِنت، زوربیگواھیں مردمانی باروا میان استمانی مردمی ھکانی گل ،اکوام متھدہ ءُ یورپی یونین ءَ ھوار آدگپ گلانی گون ءَ لوٹ کن ایں کہ آ پنجاہ ءُ پچ ھزار ءَ گیش بلوچانی پہ آجوئی ءَ وتی کرد ءَ پیلو بہ کن اَنت۔
