بلوچ نودربر گل آزاد ( بی ایس او آزاد ) ءِ جارکش ءَ وتی شنگ کرتگیں درشانے ءَ گوشتگ کہ شما درس سرپد اِت کہ بی ایس او آزاد ھمک سال 8 جون ءَ زوریں بیگواھیانی روچ ءِ درگت ءَ یاد کنت۔ ھمے وڑ ءَ اے سال ءَ بلوچ زوریں بیگواھیانی روچ ءِ درگت ءَ داں ھپتگے ءَ رسانکدر ءَ تکشامے برجم دارگ بیت۔ گل درسیں ھنکیناں پابند کنت کہ آ زوریں بیگواھیانی روچ ءِ درگت ءَ جتائیں دیوان برجم بدار اَنت۔ اے تکشام ءَ جتائیں پرکاری ھوار بنت زوریں بیگوھیانی روچ ءِ درگت ءَ بیگواھیں مردمانی کھول، زوریں بیگواھی ءِ آماچیں ھما مردم کہ جتائیں وھداں دژمن ءِ آزارانی دیمپان بوتگ اَنت۔ میان استمانی ءُ مردمی ھکانی ادارہ، سیاسی ءُ چاگردی کارکنان ھوار زندمان ءِ درسیں بھرگاں سیادی داروکیں مردمانی گون ءَ لوٹ کن ایں کہ اے تکشام ءَ بھر بزور اَنت۔
آئی ءَ گوشتگ کہ انچوش شما سرپد اِت 8 جون 2009 ءَ بلوچ سروک زاکر مجید زور بیگواہ کنگ بوتگ، 16 سال گوزگ ءَ پد انگت ءَ بیگواہ اِنت ءُ آئی باروا ھچ وڑیں سرپدی دیگ ءَ نہ اَنت۔ زاکر مجید ءَ ھوار اے میان ءَ بلوچستان ءَ ھزارانی کچ ءَ مردم زوریں بیگواھی ءِ آماچ اِنت ءُ ھمک روچ یک نہ یکے زوریں بیگواھی ءِ آماچ بوگ ءَ اِنت۔ چہ بد بھتی ءَ میان استمانی ادارہ اے جیڑہ ءِ باروا بے توار اَنت ءُ ندرگ کنگ ءَ اَنت۔ چہ بلوچ جنیناں بگر داں زھگاں زوریں بیگواھی ءِ ریاستی شوندات ءَ کس پھریز نہ اِنت ءُ انوگیں روچاں چہ سرجمیں بلوچستان ءَ درزنانی کچ ءَ مردم زور بیگواہ کنگ بوتگ اَنت۔ 8 جون ءَ بلوچ زوریں بیگواھانی روچ ءِ درگت ءَ گوں درسیں مردماں بھر زورگ ءِ لوٹ ءَکن ایں، وھدے کہ ھما مردم زوریں بیگواھی ءِ آماچ بوتگ اَنت گوں آیاں لوٹ کن ایں کہ آ وتی زوریں بیگواھی ءِ باروا رسانکدر ءَ گپ بہ کن اَنت دانکہ سرجمیں جھان ءِ دیم ءَ بلوچ راج ءِ گون ءَ بوتگیں پاکستانی زوراکی آشکار بہ بنت ءُ دژمن پاکستان زوریں بیگواھیانی شوندات ءِ درچ ءَ بند بہ کنت۔
آئی ءَ گوشتگ کہ ما گوں بلوچ راج ءَ لوٹ کن ایں کہ آ زوریں بیگواھیانی روچ ءِ درگت ءَ ھپتگی برجاھیں تکشام ءَ بھر بزور ایت ءُ بلوچستان ءَ برجاھیں پاکستان ءِ رستری کارپدانی باروا جھان ءَ گیش سرپدی بہ دے اَنت۔ دانکہ بلوچ راج ءَ اے زوراکی ءُ رستری کار ءِ بگیری ءَ گھگیری نہ کرتگ گڑا دژمن وتی کاروائیاں تیز کنت ایشی دروآھوکیں روچاں گندگ بیت۔ رسانکدر ءَ ھپتگی تکشام ءَ #BalochMissingPersonsDay ءَ کارمرز بہ کن اِت۔
