بلوچ نودربر گل پجار ءِ بنجاھی جارکش ءَ وتی درشان ءَ بیوٹمز زانشتجاہ ءَ استاد سھیل انور ءُ اکرم بلوچ ءِ دزگیری گوں ترندی دانکاں ایر جتگ ءُ گوشتگ کہ بیوٹمز ءِ نوکر پہ ھکاں مدام اولی لڑا گندگ بوتگ اَنت ءُ جوانیں کرد پیلو کنوکیں شرپنمندیں استادانی ترسینگ ءُ پد ءَ دزگیر کنگ سکا شرمی گپے ءُ اوپار کنگ نہ بیت۔ بلوچستان ءَ وانینگ ھم میاباری یے جوڑ بوتگ ھمک روچ ریاستی کمکار گوں نوکیں وڑ ءُ پیماں بلوچستان ءِ زانوگر ءُ شرپمندیں استادانی سر ءَ اُرش کنگ ءَ اَنت۔
بنجاھی جارکش ءَ دیمتر ءَ گوشتگ کہ گوشتگ کہ دانشور زرمبشتانی تہ ءَ رھشون ءِ کرد ءَ پیلو کن اَنت ءُ آ زرمبشتانی تہ ءَ شوندات ٹاھینوکیں کرد بنت۔ جھان ءِ تہ ءَ کج ءَ ھم چونیں زرمبشت ءِ گھگیری ءُ راجی شھزانتی ءِ گر ءُ دار کنگ ءَ بے سوب بوتگ اَنت گڑا آ راج ءِ دانشور ءُ آدگہ بھرگاں سیادی داروکیں مردم ءُ گچینیں مردمانی سر ءَ اُرش کرتگ ءُ گوں جتائیں وڑاں ترسینگ ءِ جھد اِش کرتگ۔ ھمے وڑ ءَ ریاست زوراکی کنگ ءُ چونیں ھم دانشور، وکیل، اھوالکار یا استاد پھریز نہ اَنت۔
آئی ءَ گوشتگ کہ ما گیشتر سرپد کنگ لوٹ ایں کہ اگاں بیوٹمز ءِ شرپمندیں استادانی بگیری ءَ وتی ناھکیں کاروائی یل نہ کرت ءُ شرپمندیں استادانی بگیری ءَ پندلاں ھواریں مردم دیم ءَ آرگ ءُ سزا دیگ نہ بوت اَنت گڑا بی ایس او پجار گوں آدگہ دیمروئی کنوکیں نودربر گلانی ھواری ءَ زھرشانی زرمبشتے برجاہ دار ایت ءُ ترندیں زھرشانی کنت۔
