کیچ: بلوچستان ءِ نامداریں اکس کش کمانچر بلوچ مرچی نیمروچ ءِ دوازہ ءَ کراچی ءَ بیران بوتگ۔
اھوالکار ءِ رد ءَ اکس کش کمانچر بلوچ کیچ ءِ ھند مند ءِ جھمنند اِنت کہ دیر اِنت ھُجوز ( معدہ ) ءُ ٹی وی ءِ نادراھی ءِ آماچ بوتگ۔ کمانچر ءَ دیر اِنت کراچی ءَ نادراھجاہ ءَ درمان کنگ ءَ بوتگ اَنت کہ آ مرچی نیمروچ ءَ بیران بوتگ۔
کمانچر بلوچ کیچ ءَ ھوار بلوچستان ءِ جتائیں ھند ءُ دمگاں بلوچستان ءِ زیبائیں ندارگاں ابید بلوچستان ءِ کشت ءُ کشاری یا کہ ساز ءُ زیملی ازباب، بلوچی زبان ءِ شائر، گشندہ، ازمکار، سیاسی ءُ چاگردی کارکن ءُ مراگشانی اکس گپتگ اَنت۔
کمانچر بلوچ نہ تیوک ءَ اکس کشے بوتگ، بلکیں آ یک راجدوستے بوتگ ءُ آئی اوست ویلپیر آرگنایزیشن ءِ پارست ءَ گریب ءُ تنگدست ءُ ھارآماچیں مردمانی کمک کرتگ۔
بلوچ راج ءِ نیمگ ءَ پہ کمانچر ءِ اکسانی نمائش ءَ جتا جتائیں جاھاں مراگش ھم برجاہ دارگ بوتگ اَنت ءُ آئی اکس ھزارانی کچ ءَ بھا بوتگ اَنت۔
چہ کمانچر بلوچ ءِ بیرانی ھال ءِ شنگ بوگ ءَچاگردی رسانکدر ءَ جتائیں بھرگاں سیادی داروکیں مردم بژن درشان کنگ ءَ اَنت۔
