شال: بلوچ چکچینی ءِ بگیری ءَ بلوچ یکجھتی کمیٹی ءِ نیمگ ءَ ھزادر، تربت، تمپ، شاپک، ھب چوکی، مستونگ، کلات، پنجگور، گْوادر، کوھلو، آواران، دالبندین، منگوچر، باگ، نال، سبی، نسیر آباد، بارکان، ھاران ءَ ھوار اسلام آباد ءُ کراچی ءَ ھم زھرشانی کنگ بوتگ۔
زرشانی کنوکیں مردماں زور بیگواھیں مردمانی اکس ءُ پلے کارڈ دستاں بوتگ اَنت۔ آیاں زوریں بیگواھیانی بگیری ءَ اوگام جتگ ءُ بیگواھیں مردمانی آجوئی ءِ لوٹ کرتگ۔
اے بارو ءَ بی وائی سی ءِ گوشگ اِنت کہ بلوچ چُکچینی ءِ شوندات چہ گوستگیں 75سالاں برجاہ اِنت، ایشی ءِ تہ ءَ کیچ ءَ بگر داں لیاری ءُ لیاری ءَ بگر داں کوہ سلیمان چوشیں ھچ بلوچ گِسے نیست کہ آ پاکستان ءِ ھمے زوراکیں شوندات ءِ آماچ نہ بوتگ ۔بلوچ چُکچینی ءِ تہ ءَ گار ءُ بیگواھی، ناھک ءَ مردمانی کُشگ، پہ زور مردماں چہ وتی گس ءُ میتگاں در کنگ، روزگار ءِ پُلگ ءُ دگہ بازیں ھمے وڑیں زوراکی ھوار اَنت۔
آئی ءَ گوشتگ کہ بلوچ یکجھتی کمیٹی ءِ نیمگ ءَ بلوچ چُکچینی ءِ بگیری ءَ یک زرمبشتے برجاہ اِنت ، اے زرمبشت ءِ تہ ءَ گل ءِ نیمگ ءَ یک مزنیں لانگ روانکے ءُ اسلام آباد ءَ ننداکے ھم برجاہ دارگ بوتگ۔ اے زرمبشت انوں وتی پنچمی پیز ءَ اِنت ، پنچمی پیز ءَ سرجمیں بلوچستان ءَ آئید ءِ درگت ءَ زھرشانیانی درچے بندات بوتگ کہ مرچی کیچ، تُمپ ءُ بلیدہ ءَ زھرشانی روانک کَشگ بوتگ کہ ایشانی تہ ءَ لس مھلوک ءَ مزنیں کَچے ءَ بھر زُرتگ ءُ ھمے کلوہ جھان ءَ سر کرتگ کہ بلوچ گوں بے تواری ءَ وتی چکچینی ءَ اوپار نہ کنت بلکیں ھر زوراکی ءِ دیم ءَ اوشت ایت ءُ گھگیری کنت ءُ وتی راجی ھستانکی ءَ رکین ایت۔
