بیگواھیں بلوچانی توار ( وی بی ایم پی ) ءِ کارگشاد سمی دین ءَ ماں چاگردی رسانکدر ایکس ءَ نبشتگ کہ ھمک سال ءِ وڑ ءَ اے آئید ءِ روچ ءَ زور بیگواھیں مردمانی کھول، وی بی ایم پی ءُ بلوچ یکجھتی کمیٹی ءِ راھبند ءِ پارست ءَ زھرشانی روانکے کش اَنت، کراچی ءَ اے زھرشانی روانک بیگاہ ءِ سے ءَ چہ شاھین کمپلیکس ءَ داں کراچی پریس کلب ءَ روت۔
آئی گوشتگ کہ کراچی ءِ جاہ منند، مردم دوست ءُ مردمی ھکانی کارکنانی گون ءَ لوٹ کن ایں کہ آ اے زھرشانی روانک ءَ ھوار بہ بنت زور بیگواھیں مردمانی کھولانی گون ءَ ھمدری بہ کن اَنت آیاں ءَ ھمے مارشت ءَ بدے اَنت کہ اے جنگ ءَ آ ایوک نہ اَنت بلکیں ھمک درد واریں دل گوں آیاں ھمراہ اِنت۔
سمی دین ءَ گوشتگ کہ انوگیں سرکار ءَ ھمے کلوہ ءَ دے ایں کہ زوریں بیگواھی مردمی ھکانی گنتریں لگتمالی اِنت۔ ایشی گوں پندل سازی ءَ اے مزنیں جیڑہ ءَ شکی کنگ ءِ بے سوبیں جھد ءَ یل بہ کن اِت ءُ گوں سنگینی ءَ بہ نند اِنت ءُ اے جیڑہ ءِ پہ مدامی گیش ءُ گیوار ءِ راہ ءَ در بہ گیج اِت۔
