سروگودھا: چارشمبے ءِ روچ ءَ زوریں بیگواھیانی بگیری ءَ زھرشانی روانک ءِ میان ءَ پنجاپ پولیس ءَ دو نودربر دزگیر کرتگ۔
بنشون ءِ رد ءَ بلوچ اسٹوڈنٹس کونسل ءِ نیمگ ءَ مرچی پہ زور بیگواھیں نودربر ھدا داد سراج ءُ آدگہ نودربرانی زوریں بیگواھیانی بگیری ءَ زھرشانی روانکے کشگ بوتگ کہ پنجاپ پولیس ءَ روانک ءِ سر ءَ بیڑ برتگ ءُ دو نودربر دزگیر کرتگ۔
زھرشانی کنوکیں نودربراں زور بیگواھیں نودربرانی اکس ءُ پلے کارڈ دستاں بوتگ اَنت ءُ آ پہ انساپ ءِ لوٹ ءَ اوگام جنگ ءَ بوتگ کہ پنجاپ پولیس ءَ پہ نودربرانی زھرشانی ءِ دارگ ءِ جھد کرتگ ءُ نودربر لٹ شاپ کرتگ اَنت۔
زھرشانی کنوکیں نودربرانی گوشگ اِنت کہ مئے زور بیگواھیں ھمبل زوتاں چہ زوت آجو کنگ یا آمیدگس ءَ پیش بہ بنت، اگاں نہ ما وتی زھرشانی ءَ دراجکش کن ایں۔
یات بہ بہ اِت کہ زور بیگواھیں نودربر ھد داد سراج ءَ پاکستانی لشکر ءِ جوڑ کرتگیں چیریں ادارھانی کارمنداں 8 مارچ 2024 ءَ چہ زپر چاراہ سرگودھا پنجاپ ءَ آوار جتگ ءُ بیگواہ کرتگ۔
پہ ھدا داد ءِ زوریں بیگواھی ءِ بگیری ءَ سرگودھا ءَ ھوار آئی جند ءِ میتگ تجابان کرکی ءَ ھم دو رند ءَ زھرشانی ءَ سی پیک دگ بند کنگ بوتگ۔
