تربت: چہ سرگودھا ءَ پاکستانی لشکر ءِ جوڑ کرتگیں چیریں ادارھانی دست ءَ زور بیگواہ کنگ بوتگیں نودربر ھدا داد سر اج ءِ کھول ءَ آئی یل نہ کنگ ءِ بگیری ءَ تربت پریس کلب ءَ پریس کانپریس کرتگ۔
آئی ءَ گوشتگ کہ ھدا داد سراج ء سراج اھمد تجابان ءِ جاہ منند اِنت کہ گوستگیں سے سال بیت آ سرگودھا ءَ جاندراھی بھرگ ءَ وانگ ءَ بوتگ۔ ما بلوچ ءِ بستار ءَ اے گپ ءَ سرپد بوتگیں کہ کجام کھول ءِ مردم ءِ زوریں بیگواھی چنچو جنجال کنت۔ بلے ما اے گپ نہ زانتگ ما ھم گوں ھمے رنجءَ دیمپانی کن ایں۔ 8 مارچ 2024 ءِ شپ ءَ ھشت ءُ سی ءُ پنچ ءَ زپراللہ چاراہ ،سرگودھا پنجاپ ءَ ھدا داد سراج ءَ سادگ پوشاکیں مردماں آوار جتگ ءُ گوں وت برتگ، آ انوں گوں ھما ھزاراں مردماں ھوار اِنت کہ آ چہ سالاں بیگواہ اَنت۔
آئی ءَ گوشتگ کہ ما پہ ھدا داد سراج ءِ آجوئی ءَ 14 مارچ ءَ زھرشانی ءَ سی پیک دگ بند کرتگ مارا واکدار ءَ ھمے دلجمی داتگ کہ آ زوت یل کنگ بیت۔ بلکیں اے پہ آ مردماں انچائیں کارے کہ مردماں چیریں بندیگجا ھاں بندیگ کن اَنت پہ آیاں انچوکیں مزنیں جیڑھے نہ اِنت، بلے ما شر سرپدیں کہ زندگی ءِ یک یک دمان گوں کجام درداں گوز ایت۔
آئی ءَ گوشتگ کہ ما دومی رند ءَ 20 مارچ ءَ رمزان ءِ ماہ ءَ داں سے روچ ءَ شھدگ بند کرتگ ءُ نشتگ ایں، بلے چو ساری ءِ وڑ ءَ اے رند ءَ ھم نہ زوراکاں رھم بوتگ ءُ نہ اے جیڑہ ءِ گوں سنگینی ءَ پہ گیش ءُ گیوار کنگ ءَ گامگیج زرتگ۔ وھدے مساپرانی ما جنجال دیستگ اَنت یک رندے پد ءَ پہ ودار کنگ ءَ گس ءَ آتگ ایں، ھچ وڑیں ھال نہ رستگ مرچی ما پد ءَ ریاست ءَ پہ یک ریاستے ءِ کرد ءِ پیلو کنگ ءَ یاد دیگ ءَ آتکگ ایں۔
آئی ءَ گوشتگ کہ ما پہ وتی زھرشانی ءَ دراجکش کنگ ءَ 31 مارچ ءَ روانک کشگ ءِ جار ءَ جن ایں،اے درگت ءَ مکران ءَ ساڑی ئیں زور بیگواھیں مردمانی کھولانی گون ءَ لوٹ کن ایں کہ آ روانک ءَ شریں وڑے ءَ بھر بزور اَنت۔ ما درس وتی توار وت بہ بہ ایں ءُ مارا پہ وتی آزیزانی آجوئی ءَ کرد پیلو کنگ لوٹ ایت ءُ اے جھد ءِ دیم ءَ برگ ھژدری اِنت۔
آئی ءَ گوشتگ کہ ما اے گپ ءَ تچک کن ایں اچما ایمن کس نہ اِنت، ریاست ءِ کانود ءِ ھیالداری کنگ ھژدری اِنت چونیں ھم مردمے ءِ بیگواہ کنگ کانود ءِ لوٹانی تہ ءَ ھوار نہ اِنت۔ اود ءَ کہ زرمبشت ودی بوت اَنت اود ءَ مردم سکا زھر ءَ بنت یا ریاست ءِ کینگداری ءَ دگانی سر ءَ درکپ اَنت۔ ریاست ھوش ءَ سر ءَ بہ کنت ءُ ریاست ءِ مردم پہ ریاست ءَ رھم بہ کن اَنت ءُ چہ پندل سازی ءَ وتی مڈیانی زوال کنگ ءِ جا ہ ءَ اے جیڑہ ءِ پہ گیش ءُ گیوارکنگ ءَ سنگین بہ بنت، انشپی پہ ھدا دا ءِ آجوئی ءَ بیوکیں کمپین ءَ کمک کن ایں ءُ 27 مارچ ءَ پہ زور بیگواھیں مردماں بیوکیں کمپین ءَ کمک کن ایں۔ ما گوں درساں ھمے لوٹ ءَ کن ایں کہ شھزانتیں مردم اے یکجاہ بہ بنت ءُ اے سیاسی جھد جیڑہ ءِ گیش ءُ گیوار کنگ ءِ راہ اِنت۔
