گوادر: گوستگیں روچ ءَ جی پی اے کمپلیکس ءَ بی ایل اے مجید برگیڈ ءِ پدائی ءَ ارش ءَ شھید بوتگیں جنگولانی لاش درسرکاری نادراھجاہ ءَ آرگ بوتگ اَنت ، آیانی لاشاں کھولانی دست ءَ دیگ ءَ نہ اَنت۔
بنشون ءِ رد ءَ شھید پدائیانی کھول مرچی سھب ءَ پہ وتی زھگانی لاشانی دزگرگ ءَ نادراھجاہ ءَ شتگ اَنت ، آیانی تہ ءَ جنین ءُ کماشیں مردم ھم ھوار اَنت آیاں پہ نیمون ودار دیگ ءَ اَنت ءُ لاشاں دیگ ءَ نہ اَنت۔
گوں شھیدانی کھولاں کیچ سول سوسائٹی ءِ سروک گلزار دوست ھم ھمراہ اِنت، چہ نادراھجاہ ءِ دیم ءَ گلزاردوست ءَ وتی تامربندے ءَ گوشتگ کہ سرکار ءِ نیمگ ءَ مرچی سھب ءَ شھیدانی لاشانی دست ءَ دیگ ءِ گپ بوتگ کہ شھیدانی کھول پہ وتی آزیزانی لاشانی دزگرگ ءَ نادراھجاہ ءَ آتکگ اَنت نوں آیاں شھیدانی لاشاں دیگ ءَ نہ اَنت۔
آئی ءَ گوشتگ کہ شھیدانی لاش جتاجتائیں ھنداں تربت، تجابان ءُ گیشکور ءَ برگی اَنت شھیدانی کھول گوں روچگی ءَ پہ وتی زھگانی لاشانی گرگ ءَ ودار ءَ اَنت گوں شھیدانی کھولاں نیمون کنگ بوگ ءُ لاشاں دیگ ءَ نہ اَنت۔
گلزار دوست ءَ گوشتگ کہ من گوں گوادر ءِ مردماں دزبندی کناں کہ پہ شھیدانی لاشانی دزگرگ ءَ مئے گون ءَ کمک بہ کن اَنت۔
