شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5381 روچ سرجم بوتگ۔ پنچ شمبے ءِ روچ ءَ چہ پنجگور ءَ سیاسی کارکن الیم شمبے، مجاھد،اکتر ءُ آدگہ مردم پہ ھمدردی درشان کنگ ءَ گدان ءَ اتلگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زورگر ءَ پہ شوربندی یے ءِ بنیاد ءَ بلوچ آبادیاں لشکر کشی بندات کرتگ۔ پاکستان ءَ بلوچستان ءِ تہ ءَ وتی شوربندی مٹ کرتگ اَنت ءُ بلوچ چکچینی تیز کرتگ۔ نوں زورگر نہ تیوک ءَ بلوچ چکچینی کنگ ءَ اِنت بلکیں گوں وتی نیموناں پندل سازی کنگ ءَ اِنت۔
آئی ءَ گوشتگ کہ گوستگیں روچ ءَ چہ تمپ ءَ دو ورنا زور بیگواہ کنگ بوتگ، روپ ء مراد ءُ پیربکش چہ پنجگور ءِ جتائیں ھنداں زور بیگواہ کنگ بوتگ اَنت۔ چہ ایشی ابید مستونگ، کلات، کوھلو ءُ ڈیرہ بگٹیءَ ھوار چشیں جاہ نیست کہ اودءَ بلوچ زورگریں لشکر ءَ زور بیگواہ نہ کرتگ اَنت۔ ھزدار ءَ ھم ورنایے آوار جنگ ءُ بیگواہ کنگ بوتگ۔
ماما کدیر گوشتگ کہ پاکستانی لشکر چہ بلوچ راجی جنز ءِ تیزی ءَ ترس آماچ اِنت ءُ مزھبی ناشرکاراں دیم ءَ آرگ ءَ اِنت دانکہ آ پہ بلوچ راجی جنز ءِ نزور کنگ ءَ مزھبی ناشرکارانی بگیری ءَ کاروائی ءِ نام ءَ بلوچ راجی جنز ءَ نزور بہ کنت۔ بلے جھان اے گپ ءَ شرسرپد اِنت کہ مزھبی ناشرکارانی جوڑ کنوک پاکستان ءُ آئی ادارہ اَنت۔ نوں بلوچ آبادیانی سر ءَ لشکرکشی تیز کنگ بیت۔
