کیچ: ھشت مارچ ءَ چہ پنجاپ ءَ زور بیگواہ کنگ بوتگیں نودربر ھدا داد ء سراج ءِ کھول ءَ کرکی تجابان ءَ زھرشانی ءَ سی پیک دگ بند کرتگ۔ زھرشانی ءَ ھندی مردماں جنین ءُ زھگاں بازیں کچے ءَ بھر زرتگ۔
زھرشانی ءِ سوب ءَ دوئیں نیمگاں گاڑیانی مزنیں کتار اوشتوک بوتگ اَنت۔ زھرشانی کنوکیں مردماں زور بیگواھیں ھداد ءِ اکس ءُ پلے کارڈ دستاں بوتگ اَنت۔ پلے کارڈانی سر ءَ جتائیں اوگام نبشتہ بوتگ۔
زھرشانی کنوکیں مردماں زوریں بیگواھی ءِ بگیری ءَ اوگام جتگ ءُ درسیں زور بیگواھیں مردمانی آجوئی ءِ لوٹ کرتگ۔
زور بیگواھیں ھداد ءِ کھول ءَ تران کرتگ ءُ گوشتگ کہ ھدا داد پہ وانگ ءَ پنجاپ سرگودھا ءَ شتگ کہ ھشت مارچ ءِ شپ ءَ زور بیگواہ کنگ بوتگ اِنت۔
آیانی گوشگ اِنت دانکہ ھدا داد آجو کنگ نہ بوتگ ما وتی زھرشانی ءَ برجاہ دار ایں۔ اگاں ھدا داد ءِ سر ءَ چونیں بھتامے ھست گڑا آمیدگس ءَ پیش کنگ بہ بیت، بے میار اِنت گڑا زوت یل کنگ بہ بیت۔
