بلوچ راجی زْرمبشت ( بی این ایم ) ءِ جارکش ءَ سندی راجدوست ھدایت لوھار ءِ کوش ایر جتگ ءُ گْوشتگ پاکستانی مھترھند زیردستیں راج ءِ مردمانی زانشت ءِ آسر کنگ ءَ شورے ءِ پد ءَ راجی سنچ داروکیں مردماں درآمیدگسی نشانگ کنگ ءُ کشگ ءَ اِنت۔ بلوچستان ءَ اے دْرچ سال 2009 ءَ بلوچ راجی زْرمبشت ( بی این ایم ) ءِ راھشون شھید واجہ گلام مھمد ، بی آر پی ءِ بنجاھی سروک شیر مھمد ءُ بی این ایم ءِ بنجاھی پتر ءِ باسک لالا منیر ءِ زور بیگواھی ءَ پد ژانگولیں کنٹانی چگل دیگ ءَ بنا بیتگ ءُ پد ءَ ھمے ناراہ ءُ زوراکیں کار داں سند ءُ پشتونوا ءَ تالان کنگ بوت۔ داں انیگ ءَ ھزارانی کچ ءَ راجدوستیں لیکہ داروکیں بلوچ ، سندی ، پشتون ءُ دگہ راج ءَ سیادی داروکیں مردم درآمیدگسی کشگ یا زور بیگواہ کنگ بیتگ اَنت۔
آئی ءَ گْوشتگ ھدایت لوھار ءِ کوش زیردستیں راجانی راجی پجار ءِ بگیر ءَ پاکستانی لشکر ءِ سک دلیں کارروائیانی دْرچ اِنت ایشی ءِ تہ ءَ دست ءُ گوش ءُ پرایمنیں جھد کنوک کشگ بیگ ءَ اَنت۔
جارکش ءَ گْوشتگ زیردستیں راج تیوک ءَ کشتگیں مردمانی جوناں چست مہ کن اَنت ، دگانی سر ءَ زھرشانی ءُ چہ میار باراں مزدانک ءِ لوٹ مہ کن اَنت بلکیں آیاں گوں ھمدستی ءُ ھم پتی ءَ پہ راستیں مزرو ءَ جھد کنگ ءُ چہ پاکستان ءَ وتی آجوئی پچ گرگ لوٹ ایت ، چہ ایشی ءَ ابید دگہ راہ نیست۔
زانگ بہ بیت ، آدینگ ءِ روچ (16 پروری 2024) ءَ سندی راجدوستیں راھشون ءُ بنداتی پدانک ءِ دربرجاہ ءِ استاد ھدایت لوھار ماں نسیرآباد سند ءَ پاکستانی چیریں واکاں نشانگ کرتگ ءُ کشتگ۔ آ زور بیگواھیں مردمانی درا کنائینگ ءِ زْرمبشت ءَ سرگرم اَت۔ آ وت ھم گْوست ءَ زور بیگواھیانی آماچ کنگ بیتگ اَت۔ آئی ءِ جنک سورٹ لوھار ءُ سسوئی لوھار سندھ ءِ زور بیگواھیں مردمانی توار ( گل ) ءِ سریں راھشون اَنت۔
