پسنی: پنچ شمبے ءِ روچ ءَ لینانی روگ ءُ آھگ ءِ بگیری ءَ جنیناں زھرشانی کرتگ ءُ کیسکو ءِ کارگس ءِ دروازگ کُبل کرتگ۔
زھرشانی کنوکیں مردمانی گوشگ اِنت کہ چنچو روچ اِنت لین روگ ءُ آھگ ءَ اَنت مردم سکا جنجالانی دیمپان اَنت۔ چہ لینانی مدامی روگ ءَ تیوگیں شھر ءَ مردمانی روزگار ھم سانمند اِنت۔
آیانی گوشگ اِنت کہ اگاں یک ماھے ءَ کیسکو ءَ لین ءِ بل دیگ مہ بیت گڑا تار بُرگ ءُ برگ بنت، مردم پہ لین ءِ بلاں پہ وھد دیگ ءَ اَنت بلے کیسکو ءِ نیمگ ءَ لینانی روگ ءُ آھگ انگت برجاہ اِنت۔
زھرشانی کنوکانی گوشگ اِنت کہ لینانی بند کنگ ءَ وھد ءُ پاس نیست، شپ بہ بیت یا روچ، سھب بہ بیت یا بیگاہ مدام لین بند کنگ بوگ ءَ اَنت۔ کیسکو مردمانی جنجالاں نہ چار ایت وتی دلیگاں کنگ ءَ اِنت۔
زھرشانی کنوکیں مردمانی گوشگ اِنت کہ ما چہ کیسکو ءِ زوراکیاں دلسیاہ ایں، ما گوں سرکار ءَ ھمے لوٹ ءَ کن ایں کہ کیسکو زوراکیانی سر ءَ دلگوش ءَ گور بہ کنت۔
