سری نگر: کشمیر ءَ ھندوستانی لشکر ءَ لشکر کشی ءِ وھد ءَ دو کشمیری ورنا تیرگواری کرتگ ءُ کشتگ۔
کشمیری رسانکدر ءِ رد ءَ ھندوستانی لشکر ءَ جنت نزیری ءِ دمگ پونچھ ءَ لشکر کشی کرتگ ءُ راہ ءُ دگ بستگ اَنت۔ میتگاں بیڑ برتگ ءُ گِس پٹ ءُ پول کرتگ اَنت۔
لشکرکشی وھد ءَ ھندوستانی لشکر ءَ ایمولینس گاڑی ھم داشتگ اَنت۔ دمگ ءِ موبائل نیٹورک بند کنگ بیتگ اَنت۔
کمشیری رسانکدر ءِ رد ءَ ھندوستانی لشکر ءَ لشکر کشی ءِ وھد ءَ آدگہ مردم زوراکی ءِ نشانگ کرتگ اَنت ءُ تیرگواری کرتگ ءُ دو کشمیری ورنا کشتگ۔ ھندوستانی لشکر ءَ کشگ بیتگیں ورنانی جون کولاں نہ داتگ اَنت کہ آیانی کھول ءُ ھندی مردماں زھرشانی کرتگ۔
بنشون: جھانی رسانکدر | اکس: دامگ
