هندوستان ءِ بُنجائی شهر دهلی ءَ ماں دهلی ءِ زانشتجاه ءَ ” ڈیجیٹل جرنلزم ، کنپلیکٹ ریجن ، زیردستیں بلوچستان ، پاکستان ءِ زیر دستیں کشمیر ، گلگت بلتستان ” ءِ بُنگپ ءِ سر ءَ یک مراگشے برجم دارگ بیتگ۔
تاک کار ءُ نبشتہ کار ، نیوز انٹرونشن ءِ واهند ءُ تامرساچ وویک سنها ءَ ماں مراگش ءَ گشتانک داتگ ءُ گْوشتگ کہ بلوچ پہ وتی آجوئی ءَ جهد کنگ ءَ انت ، هندوستان ءِ راج آهانی کمک ءَ بہ کنت۔ بلوچانی بگیری ءَ پاکستان ءِ لشکر ءِ زوراکیانی ماں جھان ءِ دیم ءَ آرگ ءَ هندوستان ءِ راج ءَ توار چست کنگی انت۔
بلوچستان ءِ هستیں جاورهالانی سر ءَ وویک سنها ءَ چمشانک داتگ ءُ گْوشتگ کہ پاکستان ءِ ریاست ءِ زوراکی ماں بلوچستان ءَ چہ هدَ ءَ گیش انت ، اود ءَ زورانسری بیگواهیں مردمانی بیگواه بیگ یک لس گپے جوڑ بیتگ۔
پاکستان ءِ لشکر بہ کُش ءُ دور دئے ءِ کارراهبند ءِ سر ءَ کار ءَ انت ءُ آ جھان ءِ هچ وڑیں بنی آدمی هکاں مان آرگ ءَ نہ انت۔ وویک سنها ءَ گْوشتگ کہ چہ پاکستان ءَ پیش چہ کرناں بلوچ وتی ڈیھ ءِ واجہ وت بیتگ اَنت۔
بیست ءُ هپت مارچ نوزده سد ءُ چل ءُ هشت ءَ پاکستان ءَ توپک ءِ زور ءَ بلوچ ڈیھ زورگپتگ ءُ چہ هما روچ ءَ بلوچ پہ وتی ڈیھ ءِ آجو ءَ جهد کنگ ءَ انت بلے آ وهد ءَ رسانکدر ءِ نہ بیگ ءِ سوب ءَ بلوچستان ءِ جیڑه چیر تراتگ۔
البہ سدانی کچ ءَ هما وهد ءَ داں هشتاد ءِ دهک ءَ بلوچاں پہ وتی ڈیھ ءِ آجوئی ءَ وتی جان ندر کرتگ انت ، هزاراں بلوچ بے لوگ بیتگ انت بلے بلوچانی آجوئی ءِ جهد ءَ وت ءَ اٹکل دوهزار دو ءَ داں دوهزار چار ءَ جھان ءِ دیم ءَ آؤرتگ وهدے ماں گوادر ءَ چین ءِ انجینئرانی سر ءَ اُرش ءَ هوار پدا کہ تراکانی درچے برجاه بوت ، آهانی زمہ واری آ وهد ءَ بی ایل ایپ ، بلوچستان لبریشن پرنٹ ءَ من اتگ ات انت کہ آئی ءِ سرکماش ڈاکٹر الله نزر انت۔
آئی ءَ گْوشتگ کہ انی پہ آجوئی ءَ جنگ کنوکیں جنگول کہ بلوچ آهاں سرمچار گُش انت ، جنگ ءِ درگت ءَ مُهکم انت ، بی ایل اے کہ اولی جنگی گل انت چہ آئی ءَ پد دگہ بازیں گلے ماں جنگی سنگراں سر بیتگ ءُ ” براس ” ءِ نام ءَ یک هواریں گلے هم هست ءُ نی بلوچ ءِ جنگ ءِ دیم پہ سوبمندی ءَ جنزان انت۔
اے هد ءَ کہ پدائی مجید بریگیڈ ءَ وتی رکینگ ءِ درچ کہ بندات کرتگ چہ اشیا شما اٹکل جت کن ئے کہ بلوچ راج ءِ تہ ءَ راجدوستی ءِ جزبگ چے هدّ ءَ انت آ وتی جانانی ندر کنگ ءُ وتی دُژمن ءِ پروش دیگ ءِ گُڈی سیمسراں سر انت۔
آئی ءَ گْوشتگ کہ بلوچ راج ءِ بگیری ءَ پاکستان وتی سرجمیں وسانی زور ءَ جنگ ءَ انت هما کار کہ اے لشکر ءَ زیک ماں بنگلادیش ءَ وتی زوراکیانی پد ءَ کرتگ ات اے وهدی ماں زورگپتیں بلوچستان ءَ چہ آئی ءَ سک باز بیمانکتریں دروشمے ءَ پاکستان پہ بلوچ ءِ پدریچ کُشی ءَ کنگ ءَ انت۔
لشکر ءَ پہ وت ءَ کُشنده ٹولی جوڑ کنگ ءِ هواری ءَ مزھبی گنوکاں هم بلوچانی بگیری ءَ کارمرز کنگ ءَ انت۔ بلوچ راج یک ” سیکولریں راج ئِے۔ وویک سنها ءَ گْوشتگ کہ بلوچ وهدے وتی هک ءُ زیردستیں ڈیھ ءِ گپ ءَ کنت تہ آ گوں بے رهمی ءَ کُشگ بنت ، درملکاں ماں کینڈا ءَ بلوچ راجی راهشون کریمہ ، بلوچیں تاککار ساجد ھسین ءَ ماں سویڈن ءَ پاکستان ءِ چیریں اداره آئی ایس آئی جنت ، بلے مزنیں رسانکدر بے توار انت –
رسانکدر ءِ بے تواری ءِ سوب ءَ بلوچستان ءِ تہ ءَ بہ اؤکیں پاکستان ءِ زوراکی تُرند تر بوان انت۔پمشکا کہ بلوچانی بزگی ءُ آهانی سر ءَ پاکستان ءِ زوراکیاں دیم ءَ نیار انت۔
ماں مراگش ءَ یک نودربرے ءَ جُست کرت کہ هندوستان ءِ سرکار پرچا بلوچاں کمک نہ کنت ؟ اشی ءِ پسو ءَ گشتانک دیوکیں سنها ءَ گْوشتگ کہ اشی ءِ پسو ءَ سرکار ترا وت بد انت بلے هندوستان ءِ مردماں بلوچانی سر ءَ بہ اؤکیں زوراکیانی سما بہ بیت ، اگاں مردم بہ لوٹنت گڑا سرکار لاچار بیت کہ مردمانی گپاں گوش بداریت۔ نودربر اے درگت ءَ پوہ بہ بنت۔
اے باروا بہ وان انت پاکستان پہ اے دمگ ءَ یک شومُکے جوڑ انت ءُ بس یک آجوئیں بلوچستانے پہ اے دمگ ءَ ایمنی آؤرت کنت۔
شمارا بنگلادیش گیر کیت یا شما ونتگ کہ نوزده سد ءُ هپتاد ءُ یک ءَ پاکستان ءِ نَود ءُ دو هزار لشکر مئے سرکار ءَ جنگی بندیگ گوں همراه ء سلاهاں یلا کرت انت ، اراں شما زان ات کہ همے جنگی بندیگیں لشکر کہ پاکستان ءَ سر بوت انت تہ دیم اش دات گوں بلوچستان ءَ ءُ هپتاد ءِ دهک ءَ بلوچ اش گوں بزگی کُشت انت۔
آهانی مال ءُ مڈیاں هوار دلوت ءُ زهگ ءُ زالبول گون وت اش بُرت انت ءُ گوں آهاں بدکاری اش کرت اگاں آ وهدی مئے سرکار ءَ آ یلا مہ کرتین انت تہ مروچی جاورهال بلکیں اے رنگ ءَ نہ بیتگ ات انت۔ اے وَ یک درسدے هم نہ انت کہ من ادا گوں شما گُشت انت۔
زورگپتیں بلوچستان ءِ جاورهال چد ءُ گیش سک باز تُرسناک انت ءُ مئے مردماں هندوستانیگاں اے درگت ءَ هچ سرپدی نیست کہ مئے رسانکدر بِھ اے درگت ءَ گپ نہ کنت ءُ بلوچستان ءِ جیڑه رسانکدر ءَ جاگہ دیگ نہ بنت پمشکا ورناهاں چاگردی رسانکدر ءِ سوب ءَ بلوچستان ءِ درگت ءَ سرپد بیگ هژدری انت۔
اے مراگش ءَ گشتانک دیوکیں وویک سنها ءِ پجی ءَ جے این یو کے لیکچرار ڈاکٹر گورو تیاگی ، ءُ پی ایچ ڈی سکالر پیاشاؤ هم هوار بیتگ۔
زانگ بہ بیت کہ دهلی زانشتجاه ءَ همک سال سے روچی مراگشے برجم دارگ بیت اشی ءِ تہ ءَ جتا ، جتائیں بهر بنت ءُ اے دمگ ءِ دگہ سے زانشتجاهانی نودربر هم بهر زور انت اے درچ ءَ بنچ سال انت کہ برجاه انت ءُ امبری اے مراگش یازده نومبر داں سینزده نومبر ءَ بیتگ کہ اے ” یوتهہ یونائٹڈ پار ویژن اینڈ ایکش ” وائی ایو وی اے ” (Youth united forb Vision and Action ) YUVA ءِ گل ءَ کرتگ۔
دهلی زانشتجاه ءَ یوتهہ کنونشن ءِ گشتانک دیوکاں زورگپتیں بلوچستان ءَ هستیں آجوی ءِ جنگ ءِ سر ءَ باوست کنگ ءِ پجی ءَ جنک ءُ بچکیں نودربراں اے درگت ءَ جُست ءُ پُرس هم کرتگ۔
بنشون: درشان | اکس: رسانکدر
