مردمی ھکانی کارکن گلزادی ءَ ماں چاگردی رسانکدر ایکس ءَ وتی جتائیں ٹویٹانی تہ ءَ نبشتگ کہ منی برات ءِ ویل ءِ پژدر ءَ منی بگیری ءَ پندل سازگ ءَ اَنت۔ اے گپ سرجمیں جھان ءِ دیم ءَ پدر اِنت کہ منی برات 12 اگست 2021 ءَ زور بیگواہ کنگ بوتگ۔ من پہ وتی برات ءِ زوریں بیگواھی ءِ بگیری ءَ جھد کرتگ، منی برات 8 پروری 2022 ءَ چہ ریاستی زنداناں آجو بوتگ۔
آئی ءَ گوشتگ کہ چہ ایشی ءَ پد منی برات ءَ کدی، چون ءُ چی ءَ سلاہ بندیں جھد ءِ گچین کرتگ ایشی بارو ءَ من ھچ سرپد نہ آں اے آئی وتی جند ءِ سوڑگ بوتگ۔
گلزادی ءَ گوشتگ کہ من پرایمنیں سیاسی جھد ءِ منوگرے آن ءُ من ھمے سرپد باں ریاست ءَ پہ بلوچ ورنایاں بلوچستان ءَ پرایمنیں سیاسی جھد ءِ درسیں راہ بند کرتگ اَنت۔ ھمے سوب ءَ ورنا سلاہ بندیں جھد ءَ بھر زورگ ءَ اَنت۔ بلکیں ریاست ءِ کِر ءَ انوں وھد ھست کہ آ ھوش ءَ سر ءَ بہ کنت ءُ وتی ردیں شوربندیانی سر ءَ دلگوش بہ کنت۔
آئی ءَ گوشتگ کہ من ھما درسیں مردماں گوں تچکی ءَ گوشگ لوٹاں کہ من پہ چوشیں پندل سازی ءَ چہ وتی سیاسی جھد ءَ ھچ وڑ ءَ دز کش نباں۔
گلزادی ءَ گوشتگ کہ من چہ وتی سیاسی جھد ءَ نہ ھچ وڑ ءَ دزکش نبان ءُ نہ من بلوچ چکچینی ءِ بگیری ءَ بے توار باں۔
