گزہ: اسرائیلی لشکر ءِ گزہ ءِ سر ءَ دومی روچ ءَ بمبگواریاں شش زھگاں ھوار بیست ءُ نوہ پلستینی مرتگ۔
دری رسانکدر ءِ رد ءَ گزہ ءَ اسرائیلی لشکر ءَ دومی روچ اِنت کہ جنگی بالیگ تر ءُ گرد کنگ ءَ اَنت۔
اسرائیلی لشکر ءِ نیمگ ءَ باھوٹیانی بُنجل نشانگ کنگ بیگ ءَ اَنت۔ زھگاں ھوار ھپت لّس شھری مرتگ ءُ بازینے ٹپی بیتگ پلستینی جان دْراھی تک ءِ وزیر ءِ گوشگ اِنت کہ اسرائیلی لشکر ءِ نوکیں اُرشاں ٹپی بیتگیں مردمانی کَچ دو سد ءَ سر بیتگ بازینے ءِ جاور ناگیگ اَنت۔
دومی نیمگ ءَ مزن ھور، پرانس، چین ءِ آدگہ ڈیھاں پہ گزہ ءِ پھریزگ ءَ باند ءَ سلامتی کونسل ءِ دیوانے بندیں کوٹی یے ءَ برجم دارگ ءِ لوٹ کنگ بیتگ۔
دومی نیمگ ءَ اسلامی جھاد زْرمبشت ءِ جنگی ٹولی الکدس بگیڈز ءَ شمبے ءِ روچ ءَ وتی درشانی ءَ گوشتگ کہ آئی ءَ تل ابیب، اشدود، اسکلان ءُ سدیروت ءَ بازین کچے ءَ راکٹ اُرش کرتگ۔ آئی وتی شنگ کرتگیں درشانی ءَ گوشتگ کہ ما جنگ نوکی بندات کرتگ۔
یات بہ بہ اِت کہ گوستگیں روچ ءَ اسرائیلی لشکر ءَ گزہ ءَ بمب گواری کرتگ اَت پنچ سالی زھگے ءَ ھوار پازدہ پلستینی مرتگ ءُ سد ءَ گیش ٹپی بیتگ اَت۔ بنشون: جھانی رسانکدر |اکس: دامگ
