بلوچ لبریشن آرمی ءِ جارکش جیھند بلوچ ءَ وتی درشان ءَ گوشتگ کہ بی ایل اے ءِ سرمچاراں چہ 15 اپریل ءَ داں 25 اپریل ءَ سرجمیں بلوچستان ءَ بیست ءُ ھپت کاروائی کرتگ۔ ایشانی تہ ءَ زورگریں پاکستانی پوج ءِ سر ءَ بمب ءُ ڈرون ارشاں ھوار سنگر گپتگیں ارش ھوار اَنت۔ اے ارشانی آسر ءَ زورگریں پوج ءِ 42 کارمند مرتگ ءُ باز ٹپی بوتگ، سرمچاراں یک پوجی یے زندگ ءَ دزگیر کرتگ۔ سرمچاراں پوج ءِ چوکی دستیگ کرتگ اَنت ءُ سلاہ برتگ اَنت۔ گوں دژمن ءَ جتائیں میڑاں سنگت شاہ کرم ملازھی پنام ساچان، گھرام بلوچ پنام کمبر ءُ آسم شاھوانی پنام رودین شھید بوتگ اَنت۔
بی ایل اے ءِ رد ءَ ھزدار ءِ ھند زھری ءَ 25 اپریل ءَ سوھند ءَ پوج ءِ سر ءَ بمب ارش کرتگ، پد ءَ سرمچاراں کاروان ءِ سر ءَ سنگر گپتگ ءُ ارش کرتگ۔ دوئیں ارشاں پوج ءِ دہ کارمند مرتگ ءُ باز ٹپی بوتگ۔ اے روچ ءَ پوج ءَ وتی لاش، گاڑی ءُ موٹرسائیکل یل داتگ اَنت ءُ جستگ۔ دومی روچ ءَ پوج ءُ کشندہ ٹولی ءَ لشکرکشی ءِ میان ءَ مردم بندیگ کرتگ اَنت ءُ یازدہ مردم نشانگ کرتگ ءُ کشتگ۔
جارکش ءَ گوشتگ کہ 16 اپریل ءَ ھاران المرک ءَ پہ لشکرکشی ءَ زورگریں پوج ءِ باز گاڑیانی سر ءَ سرمچاراں بمب ارش کرتگ ءُ پد سنگر گپتگ ءُ نشانگ کرتگ اَنت۔ ارش ءَ پد پوج پدکنز بوتگ، زورگریں پوج ءِ ھپت کارمند مرتگ ءُ دو گاڑی تباہ بوتگ۔ ھمے روچ ءَ شال ءِ کمبرانی دگ ءَ ایکل اسکواڈ پولیس ءِ موٹر سائیکل ءِ سر ءَ ترّ ءُ گرد کنوکانی سر ءَ بمب ارش کرتگ، دو ٹپی بوتگ۔
آئی ءَ گوشتگ کہ 17 اپریل ءَ سرمچاراں کوھلو ءَ زورگریں پوج ءِ نزیکیں کارمند شیر اپزل زرکون موٹر سائیکل ءِ سر ءَ سپر ءَ بوتگ، چیریں آپریشنے ءَ نشانگ کرتگ ءُ کشتگ۔ ھمے روچ ءَ بیسمگ سرمچاراں کشندہ ٹولی ءِ سروک ٹکری سمالانی ءُ سمد ءِ کاروانانی سر ءَ جُر ءُ ممائی ءَ ارش کرتگ ءُ پد ءَ دیم ءَ آیوکیں زورگریں پوج ءِ سر ءَ سرمچاراں ارش کرتگ۔ کشندہ ٹولی ءُ پوج ءِ باز کارمند مرتگ ءُ ٹپی بوتگ۔
جارکش ءَ گوشتگ کہ 18 اپریل ءَ زورگریں پاکستانی پوج ھرنائی، شاھرگ ءَ پہ لشکرکشی ءَ روگ ءَ بوتگ سرمچاراں ارش بندات کرتگ اَنت۔ میڑانی آسر ءَ پوج ءِ باز کارمند مرتگ ءُ ٹپی بوتگ، ھمے میان ءَ آرمی ءِ کارمند ابدلھلیم ء شپی مھمد دزگیر کرتگ ءُ آ مئے بندیگ اِنت، آئی جست ءُ پرس برجاہ اِنت۔
آئی ءَ گوشتگ کہ سرمچاراں جھل مگسی، شوران ءَ لیویز چوکی دستیگ کرتگ ءُ سلاہ برتگ اَنت۔سرمچارانی دگہ ٹولی یے ءَ کشندہ ٹولی ءِ بنجل دستیگ کرتگ ءُ سلاہ پل اِتگ اَنت ءُ بنجل مانداشتگ۔ زامران ءِ ھند نوانو ءَ سرمچاراں پوج ءِ راشن بروکیں دو گاڑی گپتگ ءُ مانداشتگ۔ پَنجگُور ھدابادان ءَ سرمچاراں پوج ءِ گاڑیانی سر ءَ شپ ءَ ارش کرتگ، دژمن ءِ دو پوجی مرتگ۔
جارکش ءَ گوشتگ کہ 19 اپریل ءَ زامران، مومیچ ءَ گوں پوج ءَ میڑ ءَ سنگت شاہ کرم ملازھی پنام ساچان شھید بوتگ۔ مستونگ، دشت ءِ کمبیلا ءَ سرمچارانی ارش ءَ زورگریں پوج ءِ چار کارمند مرتگ ءُ ھپت ٹپی بوتگ۔ سرمچاراں شپ ءَ پد ءَ زورگریں پوج ءِ سر ءَ ارش کرتگ ایشی آسر ءَ دگہ پنچ کارمند مرتگ ءُ باز ٹپی بوتگ۔ زورگریں پوج ءَ لاش ءُ تباھیں گاڑی یل داتگ اَنت ءُ جستگ۔
آئی ءَ گوشتگ کہ ھمے روچ ءَ سرمچاراں دشت، کنڈ مسوری ءَ زورگریں پوج ءِ بنجل ءِ سر ءَ ارش کرتگ ءُ دو پوجی کشتگ۔ھمے روچ ءِ بیگاہ ءَ سرمچاراں شال ءِ نزیکیں ھند ڈگاری دو راھی ءَ زورگریں پوج ءِ گاڑیانی سر ءَ ارش کرتگ، سے کارمند مرتگ ءُ آیانی گاڑی تباہ بوتگ۔ کمبیلا ءَ میڑانی میان ءَ سنگت آسم شاھوانی پنام رودین شھید بوتگ۔
جارکش ءَ گوشتگ کہ 22 اپریل ءَ سرمچاراں نوشکی، زرین جنگل ءَ سی ٹی ڈی ءِ کاروان ءِ سر ءَ ارش کرتگ۔دالبندین ءَ ھزانگی ءُ کرودک ءَ لیویز ءِ دو چوکی دستیگ کرتگ ءُ سلاہ برتگ اَنت۔
آئی ءَ گوشتگ کہ مستونگ، گرگینہ ءِ کوتل ءَ بی ایل اے ءَ گوں بالی ءُ ڈرون وارپیئر بھرگ” کھر “ ءَ زورگریں پوج ءِ بنجل ءَ ڈرون ارش کرتگ۔ ارش ءَ دژمن ءِ دو کارمند مرتگ ءُ چار ٹپی بوتگ۔
جارکش ءَ گوشتگ کہ 24 اپریل ءَ شال ءَ ھنہ اوڑک ءِ نزیک ءَ سرمچاراں تیل ءُ گیس کمپنی ءِ سرءَ ارش کرتگ، مزنیں مشیناں ھوار گاڑی مانداشتگ اَنت۔سوراب ھاجیکہ ءَ سرمچاراں زورگریں پوج ءِ سر ءَ بمب ارش کرتگ ءُ پد ءَ سنگر گپتگ ءُ ارش کرتگ۔ ارش ءَ زورگریں پوج ءِ چار کارمند مرتگ ءُ باز ٹپی بوتگ۔
آئی ءَ گوشتگ کہ 25 اپریل ءَ سرمچاراں شپ ءَ کلات، زاوہ ءَ زورگریں پوج ءِ کارمندانی سر ءَ ھما وھد ءَ بمب ارش کرتگ کہ آ بمب ءِ بے سان کنگ ءَ بوتگ اَنت۔ تراک ءِ آسر ءَ دو کارمند مرتگ ءُ سے ٹپی بوتگ۔ ھمے شپ ءَ سرمچاراں دالبندین، یک مچ ءَ سرمچاراں پولیس تانہ ءُ ریسٹ ھاؤس دستیگ کرتگ ءُ سلاہ پل اِتگ اَنت، رند ءَ ماڑی ءُ اود ءَ اوشتاتگیں گاڑی گوں مشیناں مانداشتگ اَنت۔
جیھند بلوچ ءَ درشان ءِ گڈی ءَ اے کاروائیانی میان ءَ پہ سرڈگار ءَ شھید بوتگیں سرمچار شاہ کرم ملازھی پنام ساچان، گھرام بلوچ پنام کمبر ءُ آسم شاھوانی پنام رودین ءَ آیانی دیمونیانی سر ءَ ستک شانی ندر کرتگ ءُ گوشتگ کہ شھیداں پہ ایردستی ءِ سانکلانی پروشگ ءُ بلوچ راجی باندات ءَ جنگ ءِ پڑا گوں دژمن ءَ دیم پہ دیمی کرتگ ءُ وتی جان ندر کرتگ اَنت ءُ آجوئی ءِ چراگ بالینتگ۔
بنشون: درشان اکس: زرمبش
