بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ ریاست ءِ لشکر روکپتی بلوچستان ءِ میتگ سیرکان ءَ بے میاریں مزورانی کوش ءَ بلوچ آجوئی لوٹوکانی بگیری ءَ پندلے ءِ دروشُم ءَ کارمرز کنگ ءَ اِنت۔
آئی گوشتگ کہ پاکستان زورگِپتیں بلوچستان ءَ پیش ءَ ھم جھانی جنگی میار باریانی چیر دیگ ءَ چوشیں پندل ساز اِتگ ءُ بے میاریں مزور کوشارینتگ اَنت، چوشیں بےسریں کار ءِ کنگ ءَ سوھو اِنت۔داںکہ اے چیزاں بلوچ آجوئی لوٹوکانی بگیری ءَ کارمرز بہ کنت بلے جھان ءُ ھمساھگیں ڈیھ پاکستان ءِ اے چھرگ ءَ شری ءَ پجاروک اَنت۔
جارکش ءَ گوشتگ کہ گوں بلوچستان ءِ آجوئی زْرمبشت ءَ بندوکیں اسٹیک ہولڈر ءَ انگت مزھبی ءُ زاتی بنیاد ءَ ھچ کودک ءُ بےمیاریں مردم ھچ وڑیں تاوان نہ داتگ اَنت ءُ نہ کہ آیانی سیاسی، چاگردی ءُ انسانی ھک پادمال کنگ جُھد کُرتگ۔
میجر گھرام ءَ گوشتگ کہ مئے جُھد ءُ مول بلوچستان ءِ آجوئی ،زمین،مڈی ءُ راجی پجار ءِ پھریزگ اِنت،ھچ کودک ءُ بےمیاریں مردم ءِ کشگ مئے ھیلکاری، بستار ءُ لیکہ ءِ بھر نہ اِنت۔
