بلوچ وومن پورم ءِ جارکش ءَ وتی درشان ءَ گوشتگ کہ پھمیدہ لگاری بلوچ ءِ گون ءَ بوتگیں دلپدردیں ویل تھنا یک نودربرے ءِ گون ءَ بوتگیں زوراکی یے نہ اِنت، بلکیں مئے چاگرد ءُ وانگی نزام ءِ مزنیں نزوری ءُ تباھی ءَ پیش دار ایت۔ پورم اے دلپدردیں ویل ءَ گوں ترندیں دانکاں ایر جنت ءُ ایشی انساپ، پھریزگ ءُ انسانی شرپ ءِ بنیادی راھبندانی تچکیں لگتمالی لیک ایت۔
آئی ءَ گوشتگ کہ مھمدی میڈیکل کالج میرپور ھاس ءِ وڑیں وانگجاھے، اود ءَ بچک ءُ جنکیں نودربرانی پھریزگ شرپ ءُ پرایمنیں چاگردے ءِ ودی کنگ بنکی زمہ واری اِنت، اود ءَ اے وڑیں ویل ءِ پیش بوگ سکا بژنیگ ءُ ایرجنگی اِنت۔
جارکش ءَ گوشتگ کہ اے ویل ھمے چیز ءِ لوٹ ءَ کنت کہ ترسینگ، بدیں رویشتءُ لٹ ءُ پل ءِ وڑیں ٹوھیں ویل تھنا مردمے ءِ ویل نہ اَنت بلکیں یک مزنیں جیڑھے ءِ رد ءَ چارگ بیت ءُ پہ ایشی گر ءُ دار ءَ گامگیج زورگ بہ بیت۔ اے وڑیں ویل نودربرانی بیسہ ءَ پروش ایت، ترس ءُ بے پھریزی پیش دار ایت ءُ وانگجاھانی شرپ ءَ تاوان دنت۔
آئی ءَ گوشتگ کہ بلوچ وومن پورم ھمے گپ ءَ زور دنت کہ چونیں ھم نودربرے ءِ گون ءَ بیوکیں ناھکی اسل ءَ نزام ءِ بے سوبی اِنت ءُ ایشی سر ءَ بے تواری ناھکیاں گئشتر کمک کنت۔ پمشکا ھژدری اِنت کہ اے ویل مسالے جوڑ بہ بیت، زوت ءُ ترندیں گامگیج زورگ بہ بیت دانکہ آھوکیں وھداں چوشیں ویل مہ بیت۔
بنشون: درشان اکس: رسانکدر