بلوچستان لبریشن پرںٹ ( بی ایل ایپ ) ءِ جارکش میجر گھرام بلوچ ءَ وتی درشانےءَگوشتگ کہ بی ایل ایپ ءِ سرمچاراں 9 اپریل 2026 ءِ بیگاہ ءِ شش ءَ شوربندی یے ءِ رد ءَ آپریشن بندات کرتگ ءُ تربت شھر ءِ نزیک ءَ سی پیک دگ داں باز اداراں بستگ۔
آئی ءَ گوشتگ کہ آپریشن ءِ بندات ءَ سرمچارانی یک ٹولی یے ءَ شاہ داد ھوٹل ءِ نزیکءَ دیمءَ جنز اتگ ءُ لوڑی ءِ جنگجاہءَ پولیس چوکی ءِ سر ءَا رش کرتگ ءُ دستیگ کرتگ۔ درسیں سلاہ ءُ پوجی سامان زرتگ اَنت۔ سرمچاراں چوکی ءِ دستیگ کنگ ءَ پد داں دو ادار ءَ پٹ ءُ پول کرتگ ءُ دژمنءِ تر ءُ گرد چارتگ اَنت۔
جارکش ءَ گوشتگ کہ آپریشن ءِ دومی بھر ءَ سرمچاراں دژمنءِ چاریگی نزام ءِ تاوان دیگ ءَ تکنیکی ارش کرتگ ءُ دشت شاہ داد ھوٹل ءِ نزیک ءَ کوہ ءِ سر ءَ جتگیں پاکستانی پوجءِ نوکیں سرویلنس کیمرہ، سولر ءُ آدگہ سامان سرجمءَ تاوان داتگ ءُتباہ کرتگ اَنت۔
آئیءَ گوشتگ کہ چہ ایشی ءَابید سرمچاراں لوڑی ءِ جنگجاہ ءُ ماشا اللہ ھوٹل ءِ میان ءَ موبائل ٹاور نشانگ کرتگ، ایشی ءَ دژمنیں پوج ءَ سرمچارانی تر ءُ گرد ءِ چاریگی ءَ چیریں کیمرہ ءُ لسننگ ڈیوائس جتگ۔
جارکش ءَ گوشتگ کہ سرمچاراں وتی درسیں مولاں سوبین بوگءَ پد دگ بندی ھلاس کرتگ ءُ وتی بندرانی نیمگءَ رھادگ بوتگ اَنت۔ ھمے میان ءَ زورگریں پوج ءِ شش گاڑیانی کاروانے ءَ سرمچارانی راہ ءِ بندگ ءِ جھد کرتگ بلے چہ جتائیں نیمگاں سنگر گپتگیں سرمچاراں پوجءِ کاروانءِ سر ءَ ارش کرتگ ءُ دیم ءَ آھگ ءَ نہ اشتگ۔ داں نیم ادارےءَ گیش برجاھیں میڑ ءَ سرمچاراں دژمن پہ پدکنز کنگ ءَ لاچار کرتگ۔ جنگءِ میانءَ پہ سرمچارانی چارگ ءِ جھد کرتگ، سرمچاراں تیرگواری کرتگ ءُ تباہ کرتگ۔
آئی ءَ گوشتگ کہ اے ارش ءَ دژمن ءِ دو گاڑی تچک ءَ ارش ءِ زد ءَ کپتگ ءُ سیمی گاڑی ءَ چہ تیرگواری ءَ باز تاوان بوتگ۔ چہ سرمچارانی ترندیں ارش ءَ دژمنیں پوج پدکنز بوتگ۔اے کاروائی ءَ پاکستانی پوجءِ باز کارمند مرتگ ءُ ٹپی بوتگ۔
جارکش ءَ گوشتگ کہ دگہ یک کاروائی یےءَ 10 اپریل2026 ءِ بیگاہ ءِ شش ءَ نوشکی ڈاک ءَ شوربندی یے ءِ رد ءَ شھدگ بستگ ءُ داں دو ادار ءَ سرجمیں ھند انگر کرتگ۔ اے میانءَ سرمچارانی یک ٹولی یے ءَ شھدگ ءَ تر ءُگرد کرتگ دانکہ دژمن ءَ تر ءُ گرد ءَ بہ گند اَنت۔
آئی ءَ گوشتگ کہ ھند ءَ تر ءُ گرد کنگ ءِ میان ءَ پولیس ءِ موٹرسائیکلانی تر ءُ گرد ءِ کنوکیں ٹولی یے دیستگ۔ کاروائیءِ میانءَ چہ پولیس کارمنداں یک نائن ایم ایم وتاس ءُ وائرلیس سیٹ پل اتگ۔ چہ بلوچ ربیتءُ انسانیت ءِ بنیاد ءَ کارمند یل داتگ اَنت۔ آیانءَ کڈن کرتگ کہ چہ بلوچ آجوئی زرمبشت ءُ مھلوک ءِ دژمنی ءَ وت ءَ گستا بدار اَنت۔
جارکش ءَ گوشتگ کہ دگہ یک کاروائی یے ءَ 11 اپریل 2026ءَ سرمچاراں نوشکیءِ ھند اھمد وال مھسسکیءَ پولیس چوکی ءِ سر ءَ ارش کرتگ ءُ دستیگ کرتگ۔ سرمچاراں چوکی ءِ دستیگ کنگءَ پد آیانی سرکاری سلاہ پل اتگ اَنت۔ دزگیریں درسیں پولیس کڈن کنگ ءَ پد انسانیتءِ بنیاد ءَ یل داتگ اَنت۔
درشان ءِ گڈی ءَ میجر گھرام بلوچ ءَ گوشتگ کہ بی ایل ایپ تچک کنت کہ بلوچستان ءَ دژمن ءِ چونیں ھم پوجی ءُ مالی شوربندی یے پھریز نہ اِنت۔ مئے اے وڑیں کاروائی داں بلوچستان ءِ آجوئی ءَ گوں ترندی ءَ برجاہ بنت۔
بنشون: درشان اکس: زرمبش
