جئے سند پریڈم موومنٹ ءِ چیئرمین سھیل ابڑو ءَ 17 مارچ 2026 ءَ جینوا اکوام متھدہ انسانی ھکانی کونسل ءِ شست ءُ یکمی مراگش ءَ تران کرتگ ءُ گوشتگ کہ چہ اکوام متھدہ ءِ سروکی ءَ گچینکاری ءِ رد ءَ سند ءَ وتواکی ءِ ھک دیگ بہ بیت۔
سھیل ابڑو ءَ گوشتگ کہ درزنانی کچ ءَ سندھی سیاسی مردم درکانودی کشگ بوتگ اَنت کہ آیانی تہ ءَ بشیر ھان کریشی، شپی مھمد کرنانی، مزپر بھٹو ءُ آدگہ مردم ھوار اَنت۔
آئی ءَ گوشتگ کہ تالب لگاری، ایوب کندھرو ءُ اجاز گاھو ءَ ھوار سد ءَ گیش سیاسی کارکن داں انوں بیگواہ اَنت۔ گوستگیں بیست ءُ پنچ سالانی میان ءَ جتائیں وھداں 3500 ءَ گیش مردم بیگواہ کنگ بوتگ اَنت۔
سھیل ابڑو ءَ گوشتگ کہ سندھی ھم آدگہ براتیں راجانی وڑ ءَ جنجالانی دیمپان اِنت۔ آیانی تہ ءَ بلوچ، پشتون، اسرائیکی، گلگتی ءُ کمشیری مھلوک ھوار اِنت۔
آئی ءَ گوشتگ کہ بی این ایم ءِ چیئرمین ڈاکٹر نسیم بلوچ ء پت ھم بیگواہ اِنت، ھمے وڑ ءَ ڈاکٹر ماہ رنگ بلوچ اے وھد ءَ زندان ءَ بندیگ اِنت۔ پشتون سروک الی وزیر درکانودی بندیگ اِنت ءُ پی ٹی ایم ءِ سروک منزور پشتین ھم جنجالانی دیمپان اِنت۔
سھیل ابڑو گڈی ءَ گوشتگ کہ سندھی راج پہ وتی وتواکی ءَ گوں پرایمن ءُ جمھوری جھد ءَ گرگ لوٹ ایت ءُ گوں اکوام متھدہ ءَ لوٹ کن ایں کہ چہ 1954 ءَ پیش سند ءَ اتکگیں مردمانی میان ءَ کوام متھدہ ءِ سروکی ءَ گچینکاری کنگ بہ بیت دانکہ سندی راج میان استمانی کانود ءِ رد ءَ گوں آجوئی ءَ وتی سیاسی باندات ءِ پیسلہ ءَ بہ کنت۔
بنشون: درشان اکس: رسانکدر
