بلوچ یکجھتی کمیٹی ءِ سروک سمی دین ءَ بلوچستان ءِ مزن وزیر سرپراز بگٹی ءِ بیان ءِ پژدر ءَ وتی درشانے ءَ گوشتگ کہ بلوچی شائری ورنایاں جزباتی کنگ ءَ اِنت، پمشکا بلوچی زبان ءِ کارکنوکیں اکیڈمیاں سرکار گوں ترندی ءَ گُر ءُ دار بہ کنت۔ کتاب پلگ بہ بنت، چی ءَ کہ کتاب ورنایاں مارشت ھیل دے اَنت ءُ ماروکیں ورنا ترسناک بنت۔ کتابجاہ بند کنگ بہ بنت، چی ءَ کہ اگاں بلوچ ورنا بوان اَنت گڑا آ شر ءُ رد ءِ پرک ءَ گیشین اَنت۔ چہ کالج ءُ یونیورسٹیاں بلوچ نودربر بیگواہ کنگ بہ بنت چی ءَ کہ وانندگیں ورنا ریاستی پالیسانی سر ءَ جست کن اَنت۔ توار دارگ بہ بنت، زبان بند کنگ بہ بیت، چی ءَ کہ بلوچ گپ جنگ ءَ اَنت۔
آئی ءَ گوشتگ کہ روزگار ءِ در بند کنگ بہ بیت، داں گساں بند کنگ بہ بنت، سپر ءِ سر ءَ پابندی جنگ بہ بیت، دانکہ بلوچ چہ یک ایمنیں زندے گوازینگ ءِ گمان ءَ زبھر بہ بنت۔ دامگ بند کنگ بہ بنت چی ءَ کہ بلوچ چہ ایشی ریاستی زوراکیاں گندگ ءُ سرپد بوگ ءَ اَنت۔ بلوچاں سالانی سال بیگواہ بہ کن ءُ پد ءَ اے جیڑہ ءَ دروگ پیش بہ کن، اگاں نہ انسانی ھکانی پاسداری کنوکیں ڈیھ جھان ءِ دیم ءَ پاشک بیت۔
سمی دین ءَ گوشتگ کہ ھمے پالیسی بوگ لوٹ ایت۔ بند کنگ پابندی جنگ، بیگواہ کنگ، کشگی اِنت، بلے کدی اے پالیسیانی سر ءَ دلگوش گور کنگی نہ اِنت چہ ھمیشی سوب ءَ سرجمیں راج ءِ بیسہ چہ ریاست ءَ ھلاس بوتگ، کدی ھم اے کشت ءُ کوش دارگ نہ بوتگ چہ ایشی ءَ بلوچستان ھونیگ اِنت، رمزان ءِ پاکیں ماہ ءَ چہ پَنجگُور ءِ وڑیں کسانیں شھرے ءَ بیست روچانی میان ءَ بیست ءُ دو ورنا کشگ بیت ءُ آیانی لاش چگل دیگ بنت۔
سمی دین ءَ گوشتگ کہ راستی ھمیش اِنت بلوچ ورنا چہ بلوچی شائری یا کتابی سوب ءَ ریاست ءِ بگیر بوگ ءَ نہ اَنت، آ ریاستی زوراکی، بلوچستان ءَ چہ سالاں برجاھیں پابندی، ھونریچی، درکانودی کوش، زوریں بیگواھی ءُ جست کنوکانی بیگواہ کنگ، زندان ءَ بندیگ کنگ ءِ پالیسیاں گندگ ءُ درکپگ ءَ اَنت، اگاں مٹ کنگ لوٹ ایت گڑا بلوچستان ءِ جاور مٹ کنگ بہ بنت۔ لبزانک ءُ کتابانی سر ءَ چہ پیسر ءَ پابندی اِنت۔
بنشون: درشان اکس: رسانکدر
