نوشکی: ھپت ماہ پیش زھگ ءُ زالبولے ءَ ھوار یکیں کھول ءِ چار مردمانی کوش ءِ بگیری ءَ کھول ءَ پریس کانپرنس کرتگ ءُ کشندھانی دزگیر کنگ ءِ لوٹ کرتگ۔
کھول ءِ دو زالبولاں نوشکی پریس کلب ءَ پریس کانپرنس کرتگ ءُ گوشتگ کہ دو مارچ ءِ روچ ءَ سریاب مل پھاٹک ءِ نزیک ءَ ابدلمجید بادینی، آئی زھگ مھبوب پنام ماشوک ءَ ابدلرشید ءُ آئی برازتک ابدلگپار ءَ بابو مھمد یاکوب مھمد شھی پہ رد دیگ ڈن ءَ لوٹائینتگ ءُ تیرگواری کرتگ۔ تیرگواری ءِ آسر ءَ مھمد یاکوب ءُ آئی لوگ بانک ءُ نھ ماھی ئیں زھگ شایان بیران بوتگ اَنت ءُ آیانی دو سالی ئیں زھگ مھمد الیاس رک اِتگ۔
بابو مھمد یاکوب مھد شھی ءِ مات ءَ گوشتگ کہ چاردہ اگست 2025 ءَ آیانی مستریں زھگ ملک مھمد یونس مھمد شھی ھم تیرگواری کنگ ءُ کشگ بوتگ۔ اے ویلانی ایپ آئی آر ما نوشکی پولیس تانہ ءَ نبشتہ کنائینتگ۔ بلے شش ماہ ءِ گوزگ ءَ پد ھم میاربار دزگیر کنگ نہ بوتگ اَنت۔
آئی مات ءَ گوشتگ کہ ما گوں بلوچستان ءِ مزن وزیر ءُ بلوچستان ءِ آئی جی پولیس ءُ آدگہ سرکاری ادارھاں لوٹ کن ایں کہ مئے کشندہ زوت دزگیر کنگ بہ بنت ءُ مارا انساپ دیگ بہ بیت۔
آئی گوشتگ کہ کشندھانی نیمگ ءَ مارا یکشل ءَ بیھار دیگ بوگ ءَ اِنت۔ ھمے سوب ءَ ما گوں سرکار ءَ لوٹ کن ایں کہ پہ مئے پھریزگ ءُ کشندھانی دزگیری ءَ زوت دلجمی دیگ بہ بیت۔
بنشون: پریس کانپرنس اکس: رسانکدر
