بلوچ یکجھتی کمیٹی ءَ وتی درشانے ءَ گوشتگ کہ یھیا بلوچ ء نور مھمد پنجگور ءِ ھند پروم ءِ جاہ منند اِنت ءُ یک ڈرائیورے۔ آ یک گریبیں کھولے ءِ مردم اِنت ءُ آئی ءَ کساں امری ءَ وتی گس ءِ زمہ واری گوں بوتگ اَنت۔
آئی ءَ گوشتگ کہ یک اکتوبر 2025 ءَ شپ ءِ ھپت ءُ نیم ءَ چہ پنجگور ءِ ھند چتکان ءَ بالی پٹ دگ ءَ کشندہ ٹولی ءِ کارمنداں بیگواہ کرتگ۔ داں شش ماہ ءَ آئی کھول گوں رنجاں وداریگ بوتگ، 3 مارچ 2026 ءَ آئی لاش پنجگُور ءِ ھند وشبود ءَ چگل دیگ بوتگ۔
آئی ءَ گوشتگ کہ اے ویل بلوچستان ءَ برجاھیں انسانی ھکانی لگتمالیاں پیش دار ایت۔ زوریں بیگواھی ءُ درکانودی کوش رمزان ءِ وڑیں پاکیں ماھے ءَ ھم برجاہ اَنت۔ بلوچانی آزیز زور بیگواہ ءُ درکانودی کشگ بوگ ءَ اَنت۔
آئی ءَ گوشتگ کہ بلوچ یکجھتی کمیٹی گوں اکوام متھدہ ءُ میان استمانی انسانی ھکانی ادارھاں لوٹ کنت آ اے جیڑہ ءِ بابت ءَ زوت دلگوش گور بہ کن اَنت۔ اے لگتمالیانی بابت ءَ پٹ ءُ پول بہ کن اَنت ءُ ایشی زمہ واراں کانود ءِ رد ءَ جست بہ کن اَنت۔
بنشون: درشان. اکس: بی وائی سی
