بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ گوشتگ کہ 24 پروری ءَ بی ایل ایپ ءِ سرمچاراں پسنی ءِ ھند کلانچ ڈوکانی ءَ پاکستانی پوج ءِ چوکی ءِ سر ءَ چہ دو نیمگ ءَ سک ءَ نزیک ءَ ارش کرتگ ارش ءِ آسر ءَ پنچ کارمند مرتگ ءُ باز ٹپی بوتگ۔
آئی گوشتگ کہ ھمے روچ ءَ دگہ یک کاروائی یے ءَ بی ایل ایپ ءِ سرمچاراں ھاران شھر ءَ گزی دگ ءَ برجاھیں پاکستانی پوج ءِ چوکی ءِ سر ءَ گرنیڈ لانچر ءِ سے گولا آس داتگ کہ آ نشانگ ءَ کپتگ اَنت۔ اے ارش ءَ پوج ءَ جانی ءُ مالی تاوان بوتگ۔
جارکش ءَ گوشتگ کہ 25 پروری ءَ بی ایل ایپ ءِ سرمچاراں یک کاروائی یے ءَ دشت ءِ ھند سنگائی ءِ سی پیک دگ ءَ برجاھیں پوج ءِ چوکی ءِ سر ءَ ارش کرتگ۔ اے چوکی پہ ھندی گاڑیانی چارگ ءَ بندگ بوتگ ءُ مھلوک دلسیاہ کرتگ۔ ارش ءِ وھد ءَ سرمچاراں راکٹ ءِ باز گولا آس داتگ کہ نشانگ ءَ کپتگ انت۔ اے ارش ءَ پوج ءَ جانی ءُ مالی تاوان بوتگ۔
آئی گوشتگ کہ ھمے روچ ءَ دگہ یک کاروائی یے ءَ سرمچاراں پہ پوج ءَ راشن بروکیں یک گاڑی یے زامران ءِ ھند نوانو ءُ گیشتردان ءِ میان ءَ گپتگ۔ اے گاڑی ءَ دژمن ءِ وردن ءِ ساماناں ھوار آدگہ سامان دستیگ کرتگ اَنت۔
میجر گھرام بلوچ ءَ درشان ءِ گڈی ءَ درسیں ارشانی زمہ واری من اتگ۔
بنشون: درشان. اکس: زرمبش
