شال: پہ زوربیگواھیں مردمانی پدجنگ ءَ وائس پار بلوچ مسنگ پرسنز(وی
بی ایم اپی) ءِ زھرشانی گدان ءَ 6089 روچ سرجم بوتگ کہ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ ایڈوکیٹ مھمد ھسن مینگل ءُ سلتانہ بلوچ زھرشانی گدان ءَ آتکگ ءُ زوریں بیگواھیانی بگیری ءَ وتی زھرشانی یاداشت کرتگ۔ گوں بیگواھیں مردمانی کھولاں ھمدردی درشان کرتگ ءُ زوریں بیگواھی ءِ درچ ءِ ھلاس کنگ ءُ درسیں مردمانی آجوئی ءِ لوٹ کرکرتگ۔
گل ءِ چیرمین نسراللہ بلوچ ءَ تران کرتگ ءُ گوشتگ کہ آئی گل ءِ نیمگ ءَ مھمد ارپان کمبرانی، تنویر اھمد ءُ بشیر اھمد ءِ کیس سرکار ءُ پہ زوربیگواھیں مردماں جوڑ کنگ بوتگیں کمیشن ءَ داتگ اَنت۔
آئی گوشتگ کہ ھبدہ سالی ئیں تنویر اھمد ءُ پازدہ سالی ئیں بشیر اھمد دوئیں وت ما وت براس اَنت کہ آ سی ٹی ڈی ءُ آدگہ ڈیھ ءِ ادارھانی کارمنداں سے پروری ءِ شپ ءَ چہ سریاب کسٹم شال ءَ آوار جتگ ءُ بیگواہ کرتگ اَنت۔
نسراللہ بلوچ ءَ گوں سرکار ءُ کمیشن ءَ لوٹ کرتگ ءُ آ مھمد ارپان کمبرانی، تنویر اھمد ءُ بشیر اھمد، آجوئی ءَ دلجمی دیگ بہ بیت۔ اگاں آیانی سر ءَ چونیں ھم بھتامے ھست گڑا دیم ءَ آرگ ءُ آمیدگس ءَ پیش کنگ ءَ وتی کرد ءَ پیلو بہ کن اَنت۔ دانکہ آیانی کھول چہ زوربیگواھی ءِ رنجاں بہ رک اَنت۔
بنشون: درشان. اکس: وی بی ایم پی
