شال: پہ زوربیگواھیں مردمانی پدجنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6088 روچ سرجم بوتگ کہ گل ءِ ایگزیکٹو کمیٹی رکن نیاز مھمد ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ جتائیں بھرگاں سیادی داروکیں مردم گدان ءَ آتکگ اَنت ءُ گوں زوربیگواھیں مردمانی کھولاں ھمدردی درشان کرتگ ءُ آیاں زوریں بیگواھیانی سر ءَ بژن درشان کرتگ ءُ زوربیگواھیں مردمانی آجوئی ءِ لوٹ کرتگ۔
وی بی ایم پی ءِ ایگزیکٹو کمیٹی ءِ کارکن نیاز مھمد ءَ گوشتگ کہ ڈیھ ءِ ادارھانی نیمگ ءَ پہ سلامتی ءِ نام ءَ زوریں بیگواھی ءُ بیگواھیں بلوچانی درکانودی کوش ءِ درچ سکا ترند کنگ بوتگ کہ اے بژنی گپے، ڈیھ ءِ کانود ءُ انسانی ھکانی گنتریں لگتمالی اِنت کہ ایشی ءَ ایر جن ایں۔
آئی گوں سرکار ءَ لوٹ کرتگ کہ زوربیگواھی ءُ بیگواھیں بلوچانی درکانودی درچ ءِ دارگ ءَ گامگیج بہ زور اَنت۔ درسیں بیگواھیں مردمانی آجوئی ءَ دلجمی بہ دئے اَنت کجام ھم بیگواھیں مردم ءِ سر ءَ بھتام ھست گڑا آ دیم ءَ آرگ بہ بنت ءُ کانود ءِ رد ءَ وتی بے میاری پیش کنگ ءِ ھک دیگ بہ بیت ءُ زوربیگواھیانی جیڑہ ڈیھ ءِ کانود ءِ رد ءَ گیش ءُ گیوار کنگ بہ بیت۔
بنشقون: درشان اکس: وی بی ایم پی
