کیچ: پرندوشی تجابان ءَ زورگریں پاکستانی لشکر ءِ دست ءَ زور بیگواہ کنگ بوتگیں نودر بھادر چاکر ءِ کھول ءِ نیمگ ءَ دو روچ اِنت کہ سی پیک دگ ءَ زھرشانی برجاہ اِنت۔
زھرشانی ءَ بھادر چاکر ءِ کھول ءِ ھواری ءَ کِر ءُ کشانی میتگانی مردماں بازیں کچے ءَ بھر زرتگ ءُ جنین ءُ زھگ ھم ھوار اَنت۔
زھرشانی نندانک ءَ زور بیگواھیں بھادر ءِ مات ءَ تران کرتگ ءُ گوشتگ کہ منی زھگ بے میاریں نودربرے پرندوشی شپ ءِ دو ءَ پاکستانی لشکر ءَ منی دیم ءَ آوار جتگ ءُ گوں وت برتگ۔
آئی ءَ گوشتگ کہ مئے ھند ءِ درسیں مردم سرپد اَنت منی زھگ وانگ ءَ اِنت ءُ منی زھگ ءَ گوں ھچ وڑیں چست ءُ ایراں کار نہ بوتگ ءُ آ نہ دگہ مردمانی ھمراھی ءَ پکنک ءُ دگہ جاھے ءَ شتگ۔
مات ءَ گوشتگ کہ ما زی سھب ءِ سر ءَ اد ءَ دگ بند کرتگ ءُ نشتگیں دوشیگیں سارتی ءُ ھور ءَ درسیں مردم جنجال بوتگ اَنت داں انوں منی لوٹ منگ بوگ ءَ نہ اَنت۔
آئی ءِ گوشگ اِنت دانکہ منی زھگ یل کنگ نہ بوتگ من ھمد ءَ زھرشانی ءَ نندان ءُ پیاد نیاھاں۔
بھادر چاکر ءِ آوار جنگ ءِ میان ءَ زورگریں پاکستانی لشکر ءَ گس ءِ جنین ءُ زھگ ھم لٹ شاپ کرتگ اَنت کہ زھرشانی نندانک جاہ ءَ تامربندے ءَ مات ءِ دست گندگ بیت کہ پاکستانی لشکر ءِ لٹ شاپ کنگ ءَ ٹپی اِنت ءُ پٹی بندوک اِنت۔
