بلوچ یکجھتی کمیٹی ءِ سروک سمی دین ءَ وتی درشان ءَ گوشتگ کہ ھمدان بلوچ ء مھمد الی 29 دسمبر 2025 ءَ چہ کراچی ءِ ھند یوسپ گوٹ ءَ زوربیگواہ کنگ بوتگ ءُ پد ءَ آئی دزگیری پدر کرتگ ءُ آمیدگس ءَ پیش کنگ بوتگ ءُ آئی کیس سند ءِ مزن آمیدگس ءَ بوگ ءَ بوتگ۔ مرچی آئی ریمانڈ ھلاس بوگی بوتگ بلے چہ ایشی یک روچے پیش آ گوں دگہ سَے زوربیگواھیں مردماں ھوار دروگیں میڑے ءَ کشگ بوتگ اَنت۔
آئی گوشتگ کہ بلوچستان ءَ دروگیں میڑانی درچ گوں ترندی ءَ برجاہ اِنت ءُ نوں ھما مردم ھم نشانگ کنگ بوگ ءَ اَنت کہ آ آمیدگس ءَ پیش کنگ بوتگ اَنت۔ اے رویشت ھمے گپ ءِ منانک اِنت کہ سی ٹی ڈی ءُ پولیس کانود ءُ آمیدگس ءِ تچکیں بگیری ءَ کنگ ءُ وت ءَ چہ کانود ءَ برزتر سرپد بوگ ءُ کاروائی کنگ ءَ اَنت۔ کانود ءِ پھازداریں ادارھانی درکانودی کاروائیانی بگیری ءَ ریاستی ادارہ ءُ آمیدگس ءِ بے تواری بژنی گپے۔
سمی دین ءَ گوشتگ ھمدان ءِ کھول ءَ اے مزنیں ناھکی ءِ بگیری ءَ کراچی پریس کلب ءِ دیم ءَ زھرشانی کرتگ۔
آئی گوشتگ کہ ریاستی زوراکی ءُ ناھکیانی بگیری ءَ گوں توار چست کنوکیں درسیں مردم، گل ءُ زانتکاریں شھریاں لوٹ کن ایں کہ آ اے زوراکی ءِ بگیری ءَ توار چست بہ کن اَنت دانکہ زورابیگواھی ءُ دروگیں میڑانی درچ دارگ بہ بیت۔
بنشون: درشان. اکس: دامگ
