شال: پاکستانی پوج ءِ دست ءَ زوربیگواھیں تنویر ءُ بشیر اھمد ءِ مات بی بی شاھدہ پہ وتی زھگانی آجوئی ءَ لوٹ کرتگ۔
بی بی شاھدہ ءِ گوشگ اِنت کہ سَے پروری ءِ شپ ءَ پاکستانی پوج ءِ کارمنداں سریاب کسٹم کلی بنگلزئی ءَ منی گس ءَ بیڑ برتگ ءُ منی دو زھگ تنویر اھمد ءُ بشیر اھمد ء شبیر اھمد آوار جتگ ءُ بیگواہ کرتگ اَنت۔ من باز منت کرتگ کہ مئے زھگاں یل بہ کن اِت۔ آیاں گوشتگ کہ تئی زھگاں گاڑی ءِ تہ ءَ جست ءُ پرس کناں ءُ مرچی شپ ءَ یل کنان ۔ بلے مرچی دوازدہ روچ گوستگ نہ کہ منی زھگ یل کنگ بوتگ اَنت ءُ نا کہ آیانی بابت ءَ مارا سرپدی دیگ بوگ ءَ اِنت۔ چہ ایشی ءَ مئے سرجمیں کھول سسائی جنجالانی دیمپان اِنت۔
آئی گوشتگ کہ منی زھگ تنویر اھمد ءِ امر ھبدہ سال اِنت ءُ بشیر اھمد ءِ امر پازدہ سال اِنت منی لوگواجہ بیران بوتگ منی زھگ چورہ اَنت ءُ من یک بے سھارئیں ماتے آں۔ من ھچ نزاناں کہ پہ وتی زھگاں چے بہ کن آں۔ من مرچی وائس پار بلوچ مسنگ پرسنز ءِ گدان ءَ آتکگ ءُ وتی توار ءَ شمارا سر کنگ ءَ آں دانکہ کسے منی توار ءَ گوش بہ دار ایت ءُ منی زھگانی آجوئی ءَ وتی کرد ءَ پیلو بہ کنت۔
آئی گوشتگ کہ من گوں سرکار ءَ لوٹ کن آں کہ آ پہ منی زھگانی آجوئی ءَ دلجمی بہ دنت۔ منی زھگ بے میار اَنت اگاں آیانی سر ءَ چونیں ھم بھتامے ھست گڑا آ دیم ءَ آرگ ءُ آمیدگس ءَ پیش کنگ بہ بنت ءُ من ءَ چہ منی زھگانی بیگواھی ءِ آزار ءَ در بہ کن اَنت۔
بنشون؛ کھول اکس: وی بی ایم پی
