بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی درشان ءَ گوشتگ کہ زورگریں پاکستان ریاست ءَ پہ زور بلوچستان دستیگ کرتگ ءُ ھپتاد ءُ ھشت سال اِنت کہ بادشاھی کنگ ءُ پہ وتی زورگپتی ءِ برجاہ دارگ ءَ بلوچ چکچینی کنگ ءَ اِنت ءُھمک روچ ءِ بنیاد ءَ بلوچ پسگاں زور بیگواہ کنگ ءَ پد آیاں در انسانی سزا دیگ ءَ اِنت۔ لھتیں بندیگ جاہ ءَدروگیں میڑ ءَ کشگ بیت ءُ آیانی لاش جنگلاں چگل دیگ بیت، لھتیں یل کنگ ءَ پد وتی باڑھی کشندہ ٹولی ءِ دست ءَ کشائین اَنت۔ بلوچستان ءِ ھمک کھول چہ اے ریاستی زوراکیاں سسائی نادراہ اِنت۔
آئی ءَ گوشتگ کہ بلوچستان ءَ برجاھیں اے آجوئی ءِ جنگ ءِ پہ بے سوب کنگ ءَ پاکستانی پوج بلوچ چکچینی کنگ ءَ اِنت۔ پہ اے چکچینی ءِ چیر دیگ ءَ زورگریں ریاست اربانی کچ ءَ زر ھرچ کنگ ءُ بلوچ راج ءِ بگیری ءَ بے سریں پندل سازی کنگ ءَ اِنت، بازیں کچے ءَ وتگڑیں رسانکدری اکاونٹانی رد ءَ ھمک روچ دروگیں ھال شنگ کنگ بیت۔ پہ بلوچ راج ءِ بے اوست کنگ ءَبلوچ راجی رھشونانی بگیری ءَ پندل سازی کنگ ءُ ڈوبارگ ءَ ھوار دگہ رد ءُ ناشریں گپ جنگ بیت۔ بلکیں اے نوکیں گپے نہ اِنت زورگر ءِ آدت اِنت آ ھمک وھد ءَ دروگانی کمک ءَ وتی مھلوک ءِ رد دیگ ءِ جھد ءَ کنت۔
آئیءَ گوشتگ کہ زورگریں پوج شریں وڑے ءَ زانت کہ بلوچ راج یک ھکی ئیں جنگے مڑگ ءَ اِنتءُ آئی ءَ مھلوک ءِ کمک گوں اِنت ءُ پمشکا آ اے ھکی ئیں زرمبشت ءِ دارگ ءَ رسانکدر ءِ سر ءَ پابندی جنگ ءَ اِنت ءُ پندل سازی کنگ ءَ اِنت۔ آ ھمے ترس ءَ اِنت کہ اگاں بلوچ ءِ راستیں کسہ جھان ءِ دیم ءَ پاشک بہ بیت ءُ اے گوستانکی راستی دلگوش دیگ بہ بیت گڑا بلوچ راجی زرمبشتءَ سرجمیں جھان ءَ زانت ءُ آ سیاسی پارست ءَ سوبین بنت۔
آئیءَ گوشتگ کہ بلوچ مھلوک ءِ درسیں بھرگ اے نوکیں مانگیشتگیں دور ءَ زورگریں پاکستانی پوج ءِ دروگیں پندل سازی ءَ وت ءَ بہ رکین اَنت ءُ اے ھکی ئیں جھد ءِسر ءَ بیسہ بہ کن اَنت، چی ءَ کہ جھان ءِگوستانک اے گپ ءِ گواہ اِنت کہ مھلوک ءِ زرمبشت ءِ دارگ آئی وس ءِ گپے نہ اِنت۔ جھان ءِ چنچو توانمندیں زرمبشت بوتگ اَنت آیان ءَ مھلوک ءِ زرمبشت ءَ پروش داتگ۔ بلوچ آجوئی زرمبشت چہ مھلوکءِ کمک ءَ وتی سپر ءَ جنزگءَ اِنت ءُ اے زرمبشت گوں ھمت، جوزگ ءُ زانشتءُ مھکمیں شوربندیاں ھمگرنچ اِنت۔
آئیءَ گوشتگ کہ بلوچستان ءِ آجوئی زرمبشت گوں اے وڑیں پندلاں دارگ نہ بیت۔ زورگریں پاکستان ریاست چنچو زوراکی بہ کنت ءُ پہ اے زرمبشت ءِ دارگءَ چنچو زر ھرچ بہ کنت بلوچستان ءِ ورنا ءُ مھلوک رد نہ کپ ایت، بلکیں آجوئی زرمبشت گیشتر گوں ترندی ءَ درسیں پڑاں برجاہ بیت۔
بنشون: درشان اکس: مونوگرام
