بلوچ نیشنل موومنٹ( بی این ایم ) ءِ انسانی ھکانی ادارہ پانک ءَ وتی سالی گزارش شنگ کرتگ۔ پانک ءِ مردمی ھکانی سالی رپورٹ ءِ رد ءَ سال 2025 ءَ ماں بلوچستان ءَ پاکستانی پوج ءَ 225 کس در آمیدگسی کشتگ ءُ 1355 زور بیگواہ کرتگ ، اے کار ریاست ءِ نیمگ ءَ برجاھیں زوراکیاں پدر کن اَنت۔
رپورٹ ءَ گْوشگ بیتگ کہ پاکستانی پوج ، چیریں ادارہ ءُ ایپ سی نودربر ، کارکن ءُ ڈیھی زانتکاراں نشانگ کنگ ءَ اَنت۔ ڈرون ءُ بالگردانی ارش ، ءُ ’ بہ کش ءُ چگل دے ‘ ءِ پالیسی مدامی کار جوڑ بیتگ اَنت۔ ناشرکاری ءِ گر ءُ دار ءِ راھبند ءُ ’ مردمی تْرام ءِ برجاہ دارگ ءِ پرمان ( تری ایم پی او ) ‘ پہ پرایمنیں شھرمنندانی چوش کہ بلوچ یکجھتی کمیٹی ( بی وائی سی ) ءِ میار بار کنگ ءَ کارمرد بیگ ءَ اِنت۔ مزنیں کچے ءَ بیوکیں مردمی ھکانی اے لگتمالی بلوچ شھرمنندانی بگیری ءَ مچانکی ڈنڈ ءِ گیش اتگیں پالیسی ءَ سھرا کنت۔
پانک ءِ رپورٹ بلوچ راج ءِ بگیری ءَ ریاستی زوراکی ءِ ترندی ءَ پیش دار ایت۔ رپورٹ ءِ رد ءَ پاکستانی پوج مردمانی سر ءَ کسانیں رنگے ءَ بیڑ آرگ ءَ نہ اِنت بلکیں شھرمنندانی بگیری ءَ وتی سرجمیں لشکری واک ءَ کاربندگ ءَ اِنت ، کہ ایشانی تہ ءَ بالیگانی ارش ھم گون اَنت۔ سال 2025 ءِ سری نیم بھر ءَ چہ درساں گیش 785 کس ءِ زوربیگواھی راست بیتگ ، پرچا کہ اے باریگ ءَ ریاست ءَ گیش بیتگیں پرایمنیں سیاسی سرگرمی ءُ راھشونانی دارگ ءَ وتی وس ءُ واک کار بستگ۔ سال ءِ رند تر ءِ ماھاں زور بیگواھیانی کچ کم بیتگ بلے درآمیدگسی کوشانی تہ ءَ گیشی اتکگ۔407 زور بیگواھیں مردم آزار دیگ ءُ چیریں آزارجاھاں زندانی کنگ ءَ پد یلہ کنگ بیتگ ، چہ ایشاں گیشتر بالاد ءُ روانی رنگ ءَ سکا سانمند اَت ، چہ ایشی ءَ ریاستی ناشرکاری گْواچن بیت۔
رپورٹ ءَ گْوشگ بیتگ کہ نودربر ءُ کاری ئیں ورنایانی سر ءَ ارش بلوچ چاگرد ءِ زانشتی ءُ سیاسی راھشوناں گمسار کنگ ءِ پاکستانی شوندات ءِ نشاندئی کن اَنت۔
رپورٹ ءَ سال ءِ مزنیں ویل ھم ھوار اَنت۔ چہ ایشاں بلیدہ ءَ ڈرون ارش (29 اکتوبر) ھوار اِنت ، اے ارش ءَ چار ورنا کشگ بوت ، کہ نکٹی ( پکنک ) کنگ ءَ اَت اَنت ، ایشاں چہ پاکستانی پوج ءَ موکل ھم گپت اَت بلے پد ءَ ھم پاکستانی پوج ءِ ڈرون ءَ جت اَنت۔ زھری ءَ بالیگانی بمبگواری (17 ستمبر) ، چہ اے ارش ءَ سئے شھرمنند بیران ءُ چکے ٹپی بوت ، ءُ چلتن ءِ کوہ ءَ بیتگیں ارش (28 اکتوبر) ءَ ورنا سکا ٹپی بوتگ۔ چہ اے ویلاں زانگ بیت کہ پاکستان یکشل ءَ میان راجی راھبنداں پروشگ ءَ اِنت۔ سال 2025 ءَ 225 ئیں درآمیدگسی کوشانی تہ ءَ زیشان زھیر ( جون ءَ زور بیگواہ ءُ آزار ءَ پد کوش ) ، اسمان مکبول ( زور بیگواھی ءِ دو روچ ءَ پد کوش ) ءُ ھلیل اھمد ( دسمبر ءَ کشگ بوت ، ابید چہ ایشی ءَ کہ وت پولیس ءَ اَت ) ھوار اَنت۔
رپورٹ ءَ راھبندانی ناراھی ءُ ریاستی ناشرکاری ءِ رنگ ءَ مزنیں کچے ءَ کاربند کنگ ءِ بارہ ءَ ھم گْوشگ بیتگ ، ریاست ءِ سیاسی ءُ ایرادگریں توارانی گٹگیر کنگ ءِ اے آزمیدگیں کار اَنت۔نامی ئیں بی وائی سی ءِ کارکن ڈاکٹر ماہ رنگ ، سبگت اللہ ، بیبگر، بیبو ءُ گلزادی ءَ ھوار ناشرکاری ءِ بگیریں گامگیج ءُ تری ایم پی او ءِ رد ءَ ناراھی دزگیر اَنت۔ گیشتریں مردمانی دزگیری تری ایم پی او ءِ سیاھیں راھبند ءِ رد ءَ داتگیں 90 روچاں ھم گْوستگ اَنت۔ 32 کارکن ناشرکاری ءِ بگیریں گامگیج ءِ رد ءَ ’ فورتھ شیڈول ‘ ءَ ھوار کنگ ءُ آیانی تر ءُ تاب ءِ ھک پچ گرگ بیتگ اَنت۔ پاکستان ءَ شھرمنندانی شھرمنندی ھک پچ گرگ ءِ کار تیز کرتگ ، چوش کہ پجار کارڈ ءِ بند کنگ ، سم کارڈ ءِ بند کنگ ، چہ سپر ءَ دارگ ءُ بینک ءِ ھسابانی بند کنگ۔
پانک ءَ میان راج ءَ دلگوش پرینتگ کہ مڈیاں سر ریچیں بلوچستان ءِ بومی چہ زند ءِ بنکی آسراتیاں زبھر اَنت۔ ریکوڈک ، سیندک ءُ گوادر بندن رنگیں کارشوراں بلوچستان ءِ مڈی کارمرد بیگ ءَ اَنت بلے بومی بنکی ھکانی لوٹگ ءِ سر ءَ گوں زور ءَ لپاشگ بیگ ءَ اَنت۔ یورپی سنت ءِ جی ایس پی پلس ءِ چار گزار کنوکیں پتر ءَ 2025 ءَ زور بیگواھی ، گپ جنگ ءِ آزادی ءِ پچ گرگ ءُ ناشرکاری ءِ گر ءُ دار ءِ گامگیج ءِ ناراھی کارمرد ءِ سر ءَ بے تاھیری درشانتگ ، چہ ایشی ءَ زانگ بیت کہ ماں بلوچستان ءَ مردمی ھکانی جاور شر نہ اَنت۔
پانک ءَ وتی 15 تاکی دلجمیں رپورٹ ءَ سال 2025 ءَ پاکستانی ریاست ءِ مردمی ھکانی بگیری دستاویزی ءَ رنگ ءَ پیش کرتگ اَنت۔
پانک ءَ زور بیگواھی ، در آمیدگسی کوش ءُ شھرمنندانی سر ءَ بالی ارشانی بند کنگ ، زوراکیں راھبندانی آسر کنگ ءُ سیاسی زندانیانی یلہ کنگ ءِ لوٹ۔
بنشون: رپورٹ اکس: نوموگرام
