شال پہ زوربیگواھیں مردمانی پد جنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6075 روچ سرجم بوتگ کہ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ چہ جتائیں بھرگاں سیادی داروکیں مردم گدان ءَ آتکگ اَنت ءُ زوربیگواھیانی بگیری ءَ توار چست کرتگ ءُ گوں بیگواھیں مردمانی کھولاں ھمدردی درشان کرتگ۔ گدان ءَ آتکگیں مردماں گوں سرکار ءَ لوٹ کرتگ کہ آ زوربیگواھی ءِ درچ ءِ ھلاس کنگ بہ بیت ءُ پہ مردمانی آجوئی ءَ وتی کرد ءَ پیلو بہ کنت۔
گل ءِ چیرمین نسراللہ بلوچ ءَ تران کرتگ ءُ گوشتگ کہ بلوچستان سرکار ءِ جارکش شاھد رند ءَ گوں اھوالکاراں گوشتگ کہ یک ھپتگے ءِ تہ ءَ بلوچستان ءَ سد ءَ گیش مردم ادارھانی کارمنداں دزگیر کرتگ۔ بلے نہ کہ اے دزگیر کرتگیں مردم آمیدگس ءَ پیش کنگ بوتگ اَنت ءُ نا کہ آیانی بابت ءَ کھولاں سرپدی دیگ بوتگ۔ چہ ایشی سوب ءَ کھول سسائی جنجالانی دیمپان اَنت۔
نسراللہ بلوچ ءَ گوں سرکار ءَ لوٹ کرتگ کہ اگاں اے دزگیر کرتگیں مردماں کسے ءِ سر ءَ ھم بھتامے ھست گڑا آ دیم ءَ آرگ ءُ آمیدگس ءَ پیش کنگ ءُ کاروائی کنگ بہ بیت ءُ چہ آیاں کسے بے میار اِنت گڑا زوت آجوئی کنگ بہ بیت ءُ کھول چہ اے جنجال ءَ در کنگ بہ بیت۔
