بلوچ لبریشن آرمی ءِ نیمگ ءَ زی ءُ مرچی ھیروپ آپریشن ءِ دومی بھر ءَ شھید بوتگیں دگہ چار پدائیانی نام ءُ اکس چہ رسانکدری تندجاہ ھکل چینل ءَ شنگ کرتگ۔
آیانی تہ ءَ امام اکلاک بزنجو پنام ھونک بلوچ، کدرت اللہ کرد پنام مجید بلوچ، مھسن الی پنام چراگ ءُ ھامد بلوچ پنام واھد ھوار اَنت۔
بی ایل اے ءِ رد ءَ شھید پدائی امام ھالک پنام ھونک بلوچ ء مھمد ابراھیم آواران ءِ ھند جاؤ، گلی ءِ جاہ منند اِنت کہ ھیروپ آپریشن ءِ میان ءَ شال ءَ ریڈ زون ءَ ریلوے اسٹیشن ءَ پدائی کرتگ۔ شھید پدائی کدرت اللہ کرد پنام مجید بلوچ ء بدل ھان کرد مستونگ ءِ ھند اسپلنجی ءِ جاہ منند اِنت ءُ شال ءِ ھند ریڈ زون ءَ پدائی کرتگ۔
آئی ءَ گوشتگ کہ شھید پدائی مھسن الی پنام چراگ ء مھمد الی پنجگور ءِ ھند نگور ءِ جاہ منند اِنت کہ آئی نوشکے ءَ پدائی کرتگ۔ شھید پدائی ھامد بلوچ پنام واھد ء پاکر بلوچ کیچ ءِ ھند ھوشاپ ءِ جاہ منند اِنت کہ آئی نوشکی ءَ پدائی کرتگ۔
چوش کہ بلوچ لبریشن آرمی ءِ نیمگ ءَ ھیروپ آپریشن ءِ دومی بھر 31 جنوری ءَ بندات کنگ بوتگ اَت ءُ داں 6 پروری ءِ بیگاہ ءَ برجاہ بوتگ۔
بی ایل اے ءِ اے کاروائی ءَ مجید برگیڈ ءِ پنجاہ پدائیاں ھوار بی ایل اے ءِ جتائیں بھرگاں ھواریں کل 93 سرمچار شھید بوتگ۔ اے میان ءَ دژمن ءِ 362 ءَ گیش کارمند مرتگ اَت۔
بلوچ لبریشن آرمی ءِ نیمگ ءَ ھیروپ آپریشن ءِ میان ءَ ھمک روچ شھیدانی نام ءُ اکس ماں رسانکدر ءَ شنگ بوگ ءَ اَنت۔
بنشون: اھوالکار اکس: زرمبش
