بلوچستان لبریشن پرنٹ ءِ جارکش میجر گھرام بلوچ ءَ وتی درشان ءَ گوشتگ کہ سرمچار گل ءِ کارے ءَ 25 جنوری 2026 ءَ پنجگور ءِ ھند تسپ ءَ شتگ اَنت کہ اود ءَ پاکستانی پوج ءَ آیانی انگیر کنگ ءِ جھد کرتگ چہ ایشی آسر ءَ سرمچارانی ءُ پوج ءِ میان ءَ ترندیں میڑے بوتگ۔ اے میڑ ءَ سرمچاراں گوں دلیری ءَ جنگ داتگ ءُ دیم ءَ روگ ءِ جھد کرتگ۔ اے گرانیں جاوراں ابید آ پشت ءَ نہ کنز اِتگ اَنت۔
آئی گوشتگ کہ اے میڑ ءَ پوج ءِ باز کارمند مرتگ ءُ ٹپی بوتگ۔ گل ءِ سے سرمچار گوں دلیری جنگ دیان ءَ شھید بوتگ اَنت۔ شھیدیں سرمچاراں داں گڈی ءَ وتی پرز پیلو کرتگ ءُ پہ آجوئی ءَ گوں وتی توکل ءَ مسالے جوڑ بوتگ اَنت۔
آئی گوشتگ کہ تسپ ءِ میڑ ءَ شھید کیپٹن پاروک بلوچ پنام سھراب ء مھمد انور پروم ءِ جھمنند اِنت ءُ 2012 ءَ بی آر اے ءَ ھوار بوتگ ءُ رند ءَ 2015 ءَ آئی بی ایل ایپ ءَ وتی جھد برجاہ داشتگ۔ آئی جتائیں پڑاں وتی زمہ واری پیلو کرتگ ءُ ھمک جاہ ءَ وتی جنگی ھنر ءُ گل ءِ کار ءُ پوجی کار برجاہ داشتگ اَنت۔ آئی زانتکاری ءُ پوجی بودناکیانی گندگ ءَ پد گل ءَ آ کیپٹن ءِ اگدہ ءَ گچین کرتگ کہ آئی سر ءَ آ داں وتی شھیدی ءَ وتی زمہ واریانی سر ءَ اوشتاتگ۔ آئی دیمونی کار ءُ کرد ءُ توکل پہ سنگتاں نادنیں کشکے اَنت۔ کیپٹن پاروک بلوچ ءِ سپر گوں مھکمی، توکل ءُ مکسد ءَ بندوکیں یک چیدگےکہ داں دراجیں مدتے ءَ گل ءِ سرگرمی ءُ مشناں سرمچارانی ءَ سروکی ءَ کن اَنت۔
آئی گوشتگ کہ تسپ میڑ ءَ شھید بوتگیں دومی سرمچار ادیل بلوچ پنام ھمید ء مراد جان پَنجگُور ءِ ھند ایسا ءِ جھمنند اِنت ءُ آ چار جنوری 2023 ءَ بی ایل ایپ ءَ شھری چیر جنگی ءِ بستار ءَ وتی جھد بندات کرتگ ءُ پد ءَ کوہ ءَ شتگ۔ آئی جتائیں پڑاں وتی سرگرمیانی وھد ءَ گوں توکل ءُ مھکمی ءَ اوشتاتگ۔ آئی کرد زمہ واری، زانشت ءُ دیمروئی ءِ پیسلہ ءِ چیدگ بوتگ۔ ادیل بلوچ ءِ مھکمی پہ سنگتاں مادنیں کشکے۔
آئی گوشتگ کہ سیمی شھید سرمچار اھمد بلوچ پنام دیدار ء مھمد پَنجگُور چتکان ہ جھمنند اِنت۔ آ 12 پروری 2024 ءَ بی ایل ایپ ءَ ھوار بوتگ ءُ گوں سنگینی ءَ وتی راجی زمہ واری پیلو کرتگ۔ آئی ھمک بھر ءَ وتی پرز پہ زانت ءُ دلکشی ءَ پیلو کرتگ۔ آ جتائیں سنگراں پوجی سرگرمیاں بھر زرتگ ءُ داں زند ءِ گڈی دمان ءَ راجی آجوئی ءُ پہ گل ءَ مھکمی ءَ اوشتاتگ۔ اھمد بلوچ ءِ دلکشی ءُ دیمونی پہ گل ءُ سنگتاں یک پھر ءِ مسالے اَنت۔ آئی جھد پہ مدامی یاد کنگ بنت۔
آئی گوشتگ کہ چارمی شھید کیپٹن ھاپز ابدلوھاب پنام ء بابر ء ھاجی ابدلمنان بادینی شال ءِ ھند ھزارگنجی ءِ جھمنند اِنت۔ آ 2019 ءَ پہ بلوچ راجی آجوئی ءِ زرمبشت ءَ بی ایل ایپ ءَ ھوار بوتگ۔ بندات ءَ آ شال ءَ شھری چیرجنگی ءَ وتی پرز پیلو کرتگ ءُ پد ءَ 2024 ءَ کوہ ءَ آتکگ کہ اود ءَ آئی بولان، ناگاھو ءُ ھربوئی ءِ دمگاں وتی کرد پیلو کرتگ۔ آئی زانتکاری ءُ پوجی بودناکی ءِ گندگ ءَ گل ءَ آ کیپٹن ءِ اگدہ ءِ سر ءَ گچین کرتگ کہ آ داں شھیدی ءَ ھمے اگدہ ءِ سر ءَ بوتگ۔ آئی وتی زمہ واری یکشل ءَ گل ءِ راھبند ءِ رد ءَ پیلو کرتگ اَنت۔
آئی گوشتگ کہ شش دسمبر 2025 ءَ کیپٹن ھاپز ابدلوھاب پنام بابر گل ءِ کارے ءِ وھد ءَ سپر ءَ بوتگ کہ راہ ءَ گوں پوج ءَ دیم پہ دیم بوتگ اَنت ءُ میڑے بوتگ۔ میڑ ءِ میان ءَ کیپٹن بابر ءَ گوں دلیری ءَ دژمن ءِ دیم پہ دیمی کرتگ ءُ آ دیم ءَ آیگ ءَ نہ اِشتگ اَنت۔ دانکہ آدگہ سنگت پہ سلامتی در بہ کپ اَنت۔
آئی گوشتگ کہ کیپٹن بابر داں وتی شھیدی ءَ کلات ءِ ھند ھربوئی ءِ زمہ وار بوتگ ءُ وتی پرز گوں جوانیں رنگے ءَ پیلو کرتگ۔
میجر گھرام بلوچ ءَ گوشتگ کہ گل اے گرانکدریں شھیداں ستک شانی ندر کنت کہ آ پہ راجی آجوئی ءَ جتائیں پڑاں سرگرم بوتگ اَنت ءُ وتی جانانی دیمونی داتگ۔ آیانی دیمونی، جھد ءُ گوں مول ءَ بندوک بوگ کہ آ پہ مدامی یاد کنگ بنت۔گل اے کول ءَ کنت کہ شھیدانی کاروان داں منزل ءَ سر کنگ بیتءُ آیانی دیمونی زوال نہ بنت۔ شھیدانی جزبگ، ھوسلہ ءُ مھکمی پہ سرمچاراں مادنیں کشکے اَنت۔
