بیرک گولڈ ءِ چیپ ایگزیکٹیو ءِ رد ءَ بلوچستان ءَ انوگیں ارش ءُ پھازداری ءِ جاورانی ناگیگی ءَ پد کمپنی ءِ بلوچستان بورڈ وتی سھر ءُ تانبہ ءِ مزنیں شوربندیانی درسیں تکانی سر ءَ پد ءَ چارگءَ اِنت۔
جھانی ھالانی شنگ کنوکیں ادارہ رائٹر ءِ رپورٹ ءِ رد ءَ بیرک گولڈکمپنی ءِ سی ای او مارک ھل ءَ وتی آمدنیانی رپورٹ ءَ پد کانپرنس ءَ گوشتگ کہ بلوچستانءَ پھازداری ءِ جاور روچ پہ روچ گنتر بوان اَنت چہ ایشیءَ پد بورڈ ءَ پیسلہ کرتگ کہ ریکوڈک شوربندی ءِ باپاری ءِ مڈیاں ھوار اے درسیں بھرانی سر ءَ دوبر چارگ بیت۔
کینیڈین کمپنی ءِ ایگزیکٹیو ءِ دیمتر ءَ گوشگ اِنت کہ ریکوڈک پراجیکٹ ءِ پھازداری انتزامیہ ءُ باپاری بجٹ ءِ سر ءِ گوں دلجمی ءَ چارگ ءَ زوت بندات کنگ ءَ ایں ءُ ایشی آسری ءَ پد نوکیں جاورانی بابت ءَ سرپد ی دیگ بیت۔
رائٹر ءِ رپورٹ ءِ رد ءَ سھر ءُ تانبہ کشگ ءِ چہ شوربندی ءِ مڈیاں پنجاہ درسد بیرک گولڈ ءِ کر ءَ اِنت ، بیست ءُ پنچ درسد پاکستان ءِ سے سرکاری ادارھانی کر ءَ اِنت ءُ بیست ءُ پنچ درسد بلوچستان سرکار ءِ کِر ءَ اِنت۔
چوش کہ بیرک گولڈ یک ڈنی کینیڈین ملٹی نیشنل کمپنی یے کہ آ گوں پاکستان ءَ سرکار ءَ منگ بوتگیں کولے ءِ رد ءَ بلوچستان ءِ ھند چاگی ءَ چہ ریکوڈک ءَ سھر ءُ تانبہ کشگ ءَ اِنت۔ بیرک گولڈ ءَ گوں پاکستان ءَ بیست ءُ دو سال ءِ کار کنگ ءِ کول کرتگ اَت۔
پاری 30 نومبر ءَ بلوچستان ءِ آجوئی لوٹوکیں سلاہ بندیں گل بلوچستان لبریشن پرنٹ ءَ سدو آپریشنل بٹالین ( سوب ) ءِ رد ءَ سیندک ءُ ریکوڈک ءَ گوں پاکستان ءَ ھواریں لٹ ءُ پلیں کمپیانی مزنیں بنجل ءِ سر ءَ ارش کرتگ اَت۔
بی ایل ایپ ءِ اے سوبمندیں کاروائی ءَ شش پدائیاں بھر زرتگ اَت ءُ سدو آپریشنل بٹالین ( سوب ) آپریشن ءَ درانڈیھ ءِ دزگیریناں ھوار 76پوجی مرتگ اَت۔
بنشون: جھانی رسانکدر اکس: دامگ
چہ بی ایل ایپ ءِ کاروائی ءَ پد بلوچ آجوئی لوٹوکیں سلاہ بندیں گل بلوچ لبریشن آرمی ( بی ایل اے ) ءَ ھیروپ آپریشن ءِ دومی بھر ءِ رد ءَ بلوچستان ءِ چاردہ شھرانی تہ ءَ یکیں وھد ءَ کاروائی کرتگ ۔ اے کاروائی داں شش روچ ءَ برجاہ بوتگ ءُ بی ایل اے ءِ نود ءُ سے سرمچار شھید بوتگ۔
بلوچ آجوئی لوٹوکیں سلاہ بندیں گلاں ھمک وھد ءَ وتی درشانانی رد ءَ ڈنی کمپنی گوں پاکستان سرکار ءَ بلوچستان ءَ باپاری ءَ کڈن ھم کرتگ اَنت۔
