برتانیہ پارلیمنٹ ءَ بلوچستان ءَ پاکستان ءَ زوریں بیگواھی ءُ مچی سزا ءِ جیڑہ ءِ سر ءَ بژن درشان کنگ بوتگ۔ ایو ان ءَ پیش کنگ بوتگیں نوٹسے ءَ گوشگ بوتگ کہ مھمد ساجدی، نئیم ساجدی ءُ رپیک بلوچ 2 پروری 2026 ءَ شپ ءِ سے ءُ نیم ءَ چہ ھب چوکیءَ گس ءَ پوج ءُ سی ٹی ڈی ءَ آوار جتگ ۔
ھمے گوشگ بوتگ کہ مھمد بکش ساجدی بلوچ نیشنل موومنٹ ءِ چیئرمین ڈاکٹر نسیم بلوچ ءِ پت اِنت ءُ نئیم ساجدی ءُ رپیک بلوچ آئی ناکو اَنت۔ سے ئیں مردم پیشیگیں سرکاری نوکر اَنت کہ آ بے میار ءَ آوار جنگ بوتگ اَنت آیانی بابت ءَ ھچ وڑیں سرپد دیگ ءَ نہ اَنت۔
برتانیہ پارلیمنٹ ءِ باسکاں بلوچستان ءِ مزن وزیر ءِ ھمے درشان ءِ سر ءَ بژن درشان کرتگ کہ مردمے ءِ ناشرکاری ءِ بھتام ءَ آئی کھول زمہ وار لیکگ بیت، اے مچی سزا زانگ بیت۔
آیاں گوشتگ کہ زوریں بیگواھی ءُ مچی سزا میان استمانی انسانی ھکانی کانود ءِ بگیری زانگ بیت۔
نوٹس ءَ ھمے لوٹ کنگ بوتگ پاکستان سرکار زوت زور بیگواھیں مردمانی بابت ءَ سرپدی بہ دنت ءُ کانود ءِ رد ءَ کھولاں ھال بہ دنت ءُ آیاں یل بہ کنت۔
گوں برتانیہ سرکار ءَ لوٹ کنگ بوتگ کہ اے کیس ءِ بابت ءَ زوت پاکستان سرکار ءَ جست بہ کنت۔
بنشون: درشان اکس: رسانکدر
