بلوچ لبریشن آرمی (بی ایل اے) ءِ جارکش جیئند بلوچ ءَ وتی درشان ءَ گوشتگ کہ آپریشن ھیروپ ءِ درگت ءَ زمینی جاور ءُ دژمنیں پوج ءِ دروگیں درشان ءِ پژدر ءَ یک رندے پد ءَ تچک ءَ اے جار ءَ جن ایں کہ آپریشن ھیروپ ءِ دومی بھر ششمی روچ ءَ گوں مھکمی ءَ یکشل ءَ پوجی سوبمندی ءَ ھوار برجاہ اِنت۔ دانکہ بی ایل اے وت آپریشن ءِ ھلاسی ءِ جار ءَ مہ جنت داں آ وھد ءَ زورگریں ریاست ءِ ٹاپار ءُ آئی ایس پی آر ءِ پندل دروگ اَنت کہ آیاں نہ زمینی جاوراں دز رس ھست ءُ نہ کہ بلوچ چاگرد ءِ تہ ءَ بیسہ۔
آئی گوشتگ کہ آئی ایس پی آر ءِ انوگیں شنگ بوتگیں درشان ھما دروگیں ٹاپارانی بھر اَنت کہ آ آپریشن ھیروپ ءِ اولی روچ ءَ بندات کنگ بوتگ اَت۔ ریاست ءَ اولی روچ ءَ ھمے دروگیں ٹاپار جتگ اَت کہ آیاں آپریشن سرجم کرتگ ءُ درسیں اُرشکار جتگ اَنت۔ ھمے ٹاپاراں گوستگیں شش روچ اِنت کہ آ یکشل ءَ جنگ ءَ اَنت۔ آیانی ھمک نوکیں درشان گوستگیں ٹاپاراں رد کنت ءُ آ ھمک وتگڑیں سوبمندی ءِ ٹاپار راستی ءَ پروش ورگ ءِ نوکیں منانکے جوڑ بیت ءُ دیم ءَ کئیت۔ چونیں ھم زانتکاریں اھوالکارے یا پہ سرپدیں مردمے ءَ سرپد بوگ گران نہ اِنت کہ زورگریں پاکستانی پوج نہ تھنا جنگ ءِ پڑ ءَ بے سوب اِنت بلکیں درشانی رد ءَ ھم سرجم ءَ تباہ اِنت۔
آئی گوشتگ کہ بی ایل اے ءِ سرمچار ءُ پدائیاں وتی گھگیری پہ شھیدی َءَ گچین کرتگ۔ پہ ما چونیں ھم سرمچارے ءِ شھیدی یک پھر ءُ راستی، گھگیری ءِ نوک ءُ پہ آیوکیں پدریچاں توکل ءِ چیدگ اِنت۔ بی ایل اے وتی شھیدانی نام، اکس ءُ کچ ءَ شھیدی ءِ جاور ءَ گوں پھر ءَ شنگ کنت ءُ آیانی پگر ءَ زرمبشت ءِ بنیاد ءَ مھکم کنت۔ ایشی جاہ ءَ پاکستانی پوج وتی باڑھی سپاھیانی لاشاں چیر دنت۔ آیانی پجار ءَ چیر دنت ءُ آیانی تابوتانی سر ءَ بے تواری ءِ مھُر ءَ جنت۔ پرچا کہ آ زانت کہ اے مردم انچیں زالمیں جنگے ءِ بھر جوڑ بوتگ اَنت کہ آئی ءَ نا اکلاکی بنیاد ھست نہ سیاسی مول ءُ نہ مھلوک ءِ پلہ مرزی ۔
آئی گوشتگ کہ آپریشن ھیروپ ءِ وھد ءَ بی ایل اے ءَ بلوچ مھلوک ءِ کمک، انٹیلیجنس کمک، ءُ اکلاکی پلہ مرزی گوں بوتگ۔ آ پہ زورگریں ریاست ءَ منگی گپے نہ اِنت۔ ریاستی ادارہ کہ تپنگ ءِ زور ءَ زمین ءِ دستیگ کنگ ءِ بے سوبین جھد ءَ کنگ ءَ اَنت۔ ایشی پژدر ءَ بی ایل اے ءَ وتی بنکی گھگیری ءُ یکشلیں دیمونیانی سر ءَ زرمبشت یک مھکمی توانے جوڑ کرتگ۔
آئی گوشتگ کہ ما یکبرے پد ءَ تچک ءَ گوش ایں کہ آپریشن ھیروپ ءِ ھلاسی ءُ سوبمندی ءِ جار ءَ تھنا بی ایل اے جنت نہ کہ آ زورگریں تاگت کہ ھمک روچ وتی پروش ءِ چیر دیگ ءِ بے سوبیں جھد کنگ ءَ اِنت ءُ وھدے بی ایل اے آپریشن ءِ ھلاسی ءِ جار ءَ جنت آ جار نہ تھنا زمینی گر ءُ دار، چیریں تک ءِ سوبندی ءُ دژمن ءِ پروش ءِ منانکاں ھوار بیت، بلکیں انچوش بیت چوش کہ گوستگیں شش روچ اِنت بی ایل اے ءَ دژمن ءِ دستیگ کرتگیں ھند داشتگ اَنت۔ تباھیں چوکی ءُ دستیگ کرتگیں پوجی سامانانی اکس ءُ تامراں وتی رسانکدر ءِ چینل ءَ شنگ کرتگ اَنت۔
بنشون: درشان اکس: زرمبش
