وائس پار بلوچ مسنگ پرسن ( وی بی ایم پی ) ءَ وتی درشان ءَ گوشتگ کہ پاکستانی پوج ءِ دست ءَ زور بیگواھیں ھسنین بلوچ ءُ اُمر بلوچ ءِ کھول ءَ آیانی زوریں بیگواھی ءِ کیس گل ءِ کِر ءَ یاداشت کرتگ۔
آئی ءَ گوشتگ کہ کھول ءِ گوشگ اِنت ھسنین بلوچ ء بابل جان ءِ اُمر پانزدہ سال اِنت کہ آ ڈگری کالج ءِ نودربرے، پاکستانی پوج ءَ 3 پروری ءَ چہ شال ءِ ھند کلی اگزر آباد، سریاب کسٹم ءَ آوار جتگ ءُ بیگواہ کرتگ ءُ آئی بابت ءَ کھول ءَ سرپدی دیگ ءَ نہ اَنت چہ ایشی سوب ءَ مئے سرجمیں کھول رنجانی آماچ اِنت۔
آئی ءَ گوشتگ کہ زور بیگواھیں اُمر بلوچ ءِ کھول ءِ گوشگ اِنت کہ ھمے سال ءِ یک پروری ءَ چہ شال ءِ برما ھوٹل ءَ پاکستانی پوج ءَ نودربر اُمر بلوچ ء ابدرؤپ آوار جتگ ءُ بیگواہ کرتگ کہ کھول ءَ آئی بابت ءَ ھال دیگ ءَ نہ اَنت کھول سکا جنجال اِنت۔
وی بی ایم پی ءِ چیئرمین نسر اللہ بلوچ ءَ گوں سرکار ءَ لوٹ کرتگ کہ اگاں ھسنین بلوچ ءُ اُمر بلوچ ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بنت بے میار اَنت پہ آیانی آجوئی ءَ وتی کرد ءَ پیلو بہ کن اِت۔
