بلوچ یکجھتی کمیٹیءَ وتی شنگ کرتگیں درشانےءَ گوشتگ کہ جاسم ء آدم یک مزدورے ءُ پنجگور ءِ جاہ منند اِنت، آ بیگواہ کنگ ءُدرکانودی کشگ بوتگ۔آئی ژانگولیں لاش چہ وشبود ءَ دزکپتگ۔
آئیءَ گوشتگ کہ زوریں بیگواھی ءَ پد آئی بابتءَ ھچ وڑیں ھال دیگ نہ بوتگ ، چہ ایشی کھول جنجالانی دیمپان بوتگ۔ رند ءَ آئی آزار داتگ ءُ تیرسپتگیں لاش ءِ وشبود ءَ دزکپگ ھمے گپ ءِ منانک اِنت کہ آ بندیگجاہ ءَ کشگ بوتگ۔
بی وائی سی ءَ گوشتگ کہ اے کوش تچکءَ پاکستانی پوج ءِ جوڑ کرتگیں کشندہ ٹولیءِ کارپداں پیش دار ایت کہ آ سرجمیں بلوچستان ءَ ناشرکاریاں سرگرم اَنت۔ جاسم بلوچ یک انچیں کھولے ءِ مردم اِنت کہ آئی مزدوری کرتگ ءُوتی کھول والینتگ۔ آئی زوریں بیگواھی ءُ کوش ، درکانودی کوشانی گیش بوگ ءَ پاشک کنت کہ ایشی رد ءَ ھمک بھرگ ءِ مردم نشانگ بوگ ءَ اَنت۔
آئی ءَ دیمتر ءَ گوشتگ کہ اےوڑیں کوش بلوچ مھلوک ءِ ترس، بے پھریزی ءُ مچی رنجاں گیش کنت۔ریاستی پلہ مرزی ءَ اے آزاردھیانی برجاھیں مھم ءَ چاگرد جنجال کرتگ ءُ بلوچستان ءَ ریاستی پوج ءِ ناشری پاشک بوگ ءَ اَنت۔
بنشون: درشان اکس: مونوگرام
