بلوچ نیشنل موومنٹ ءِ چیئرمین ڈاکٹر نسیم بلوچ ءَ پارٹی ءِ پیشیگیں بنجاھی کارگشاد شھید ٖڈاکٹر منان بلوچ ءُ آئی سنگتانی شھیدی سالروچ ءِ درگت ءَ وتی درشان ءَ گوشتگ کہ ڈاکٹر منان بلوچ ءَ یک راھبند دوست، نہ ترس ءُ دوچاریں سیاسی سروکے ءِ بستار ءَ یاد کن ایں، ڈاکٹر منان بلوچ پہ کار ءِ ھساب ءَ یک ڈاکٹرے بوتگ بلے آ وتی راج ءِ سرپدی دیوکیں رھشونے اَت۔ آ ئی چہ بے تواری ءَ جاہ ءَ گھگیری، ترس ءَ ابید راستی ءُ چہ ایردستی ءَ ابید شرپ ءِ راہ گچیں کرتگ۔
ڈاکٹر نسیم بلوچ ءَ گوشتگ کہ 2016 ءَ مستونگ ءَ ڈاکٹر منان بلوچ گوں آئی سنگت بابو نوروز، ھنیپ بلوچ، اشرپ بلوچ ءُ ساجد بلوچ پاکستان ریاست ءَ شھید کرتگ۔ آیانی میار ھمیش اِنت آئی ءَ پہ آجوئی ءُ بنکی ھکانی گوں پرایمنی ءَ لوٹ کرتگ۔ اے ویل ھمے راستی ءَ پدر کنت کہ پاکستانی زورگپتی ءَ پرایمنیں سیاسی جھد گوں زور ءُ آزاردھی ءَ دارگ بنت۔
آئی ءَ گوشتگ کہ ڈاکٹر منان بلوچ ءَ مھکمیں سیاسی جھد کنوک، مھلوک ءِ زانشت ءُ مچی زرمبشت ءِ سر ءَ سدک بوتگ۔ آئی مارشت، دیمونی ءُ جھد مرچی ھم بلوچ ورنایانی رھشونی ءَ کنگ ءَ اِنت۔
ڈاکٹر نسیم بلوچ ءَ گڈی ءَ گوشتگ کہ بلوچ راجی شھیدانی دیمونی کدی بے ھال کنگ نہ بنت۔ آیانی لیکہ برجاہ بیت ءُ داں آجوئی، انساپ ءُ شرپ ءَ جھد ھر ھساب ءَ برجاہ بیت۔
