بلوچ اسٹوڈنٹس آرگنائزیشن آزاد ءِ جارکش شولان بلوچ ءَ وتی درشان ءَ شھید ڈاکٹر منان بلوچ ءُ آئی سنگت بابو نوروز،اشرپ بلوچ، ساجد جان ءُ ھنیپ بلوچ ءَ آیانی شھیدی ءِ دھمی سالروچ ءِ درگت ءَ ستک شانی ندر کرتگ ءُ گوشتگ کہ اے زورگریں ریاستانی آدت بوتگ کہ وھدے چونیں سرڈگارے دستیگ کرتگ اود ءِ جاہ منندیں راج ءِ پہ ھلاسی ءُ آئی پجار ءِ ھلاس کنگ ءَ زوراکی کرتگ گڑا اود ءَ راجانی تہ ءَ لھتیں نہ ترسیں پسگاں زورگری ءِ بگیری ءَ گھگیری کرتگ ءُ وتی درس پہ راج ءَ ببا داتگ اَنت۔ ھمے لڑ ءَ ڈاکٹر منان بلوچ ءُ آئی سنگت ھوار اَنت کہ آیاں پہ بلوچستان ءِ آجوئی ءَ وتی زندمان ءِ ھمک دمان نہ چارتگ ءُ جھد کرتگ ءُ دانکہ گڈی دمان ءَ گوں وتی گرانبھائیں مول ءَ بندوک بوتگ اَنت۔
آئی ءَ گوشتگ کہ ڈاکٹر منان بلوچ، بلوچ راجی آجوئی زرمبشت ءِ ھما سروک بوتگ کہ آئی لس مھلوک ءِ تہ ءَ داشتگ ءُ مھلوک پہ آجوئی ءَ یکجاہ کرتگ۔ آ ھمک وھد ءَ بلوچستان ءَ سپر ءَ بوتگ ءُ بلوچ مھلوک ءِ جنجالانی گوش دارگ ءُ آیانی رھشونی ءَ کنگ ءَ بوتگ، آ یک سیاسی سروکے ءِ ھواری ءَ یک ڈاکٹرے بوتگ ءُ وتی سنگتانی الاج ءَ ھوار لس مھلوک ءَ الاج ءَ بوتگ۔ اے وت یک آشوبی کارے۔ مھلوک ءِ سیاست ءِ سرپد بوگ ءُ آ راستی ءِ بنیاد ءَ کار کنگ ءَ مدام دیم ءَ گندگ بوتگ ھمیشی آسر ءَ آ یک آشوبی ءُ سیاسی سروکے منگ بوتگ۔ چہ آئی اے کار ءُ جھد ءَ مارا ھمے سکین رس ایت کہ آ بلوچستان ءَ مھلوک ءِ سیاست ءِ سر ءَ ستک بوتگ ءُ مھلوک ءِ تہ ءَ سیاست کنگ ءَ بوتگ، وھدے کہ آ شھید بوتگ گڑا ھما وھد ءَ آئی سنگت مھلوک ءِ تہ ءَ بوتگ اَنت ءُ آیانی سیاسی رھشونی ءَ کنگ ءَ بوتگ اَنت۔
جارکش ءَ گوشتگ کہ ما ڈاکٹر منان بلوچ ءُ آئی سنگتاں شھیدی ءِ دھمی سالروچ ءِ درگت ءَ ستک شانی ندر کن ایں۔ بلوچ کارکن ھما کرد ءَ وتی بامرد بہ لیک اَنت ءُ آئی ءَ بوان اَنت ءُ آئی جھد ءِ رندگیری ءَ بہ کن اَنت۔
