بلوچ اسٹوڈنٹس ایکشن کمیٹی ءِ جارکش ءَ وتی درشان ءَ گوشتگ کہ مرچی نوکیں جھان پہ وانگ ءَ دیمروئی کنگ ءَ اِنت، اد ءَ بلوچستان چہ وانگی پدمنتگی ءِ گنتریں جاوراں گوزگ ءَ اِنت۔ اکنامک سروے 2024 _ 25 ءِ انوگیں رپورٹ یک تھلیں راستی یے پیش دار ایت، آئی رد ءَ بلوچستان ءَ وانگ ءِ کساس 40.01 درسد اِنت۔ وھدے کہ زالبولانی 36.8 درسد ءَ بندوک اِنت۔ چہ اے کچ ءُ کساسانی رد ءَ سرکار ءِ نیمگ ءَ شریں وانگ ءِ پہ زانت بے سوب ءَ پیش دار ایت۔
آئی ءَ گوشتگ کہ 24 جنوری ءِ روچ ھمے یاتگیری ءَ برجم دارگ بیت کہ بلوچستان ءَ وانگجاہ بند اَنت ءُ ورنا چہ وانگجاہ ءُ کالجاں دوری ءِ ھواری ءَ بازیں جنجالانی آماچ اَنت۔ اد ءَ وانگ نہ تھنا بے ارزیشتی ءَ گندگ بیت بلکیں وانگی نزام پہ زوراکی ءِ گیش کنگ ءَ کارمرز بوگ ءَ اِنت۔
جارکش ءَ گوشتگ کہ چہ سرکار ءِ نیمگ ءَ ھمے ٹاپار جنگ بیت کہ وانگجاہ بند نہ اَنت ءُ زھگ چہ وانگجاھاں ڈن نہ اَنت، بلے زمینی راستی ایشی ءَ رد کنت۔ شال ءِ وڑیں بنجاھی شھرے ءَ وانگ ءِ تباھی ءِ جاورھال سرکار ءِ ایرادگریاں تچک ءَ پیش دار ایت۔ ما ھمے سرپد بہ ایں وانگ انسان ءِ بنکی ھک اِنت، اے دگہ لاٹری یے نہ اِنت کہ پلگ یا مٹ کنگ بیت۔
آئی ءَ گوشتگ کہ مرچیگیں روچ ءَ ما نہ تھنا گوں ھما زھگاں یکجھتی کن ایں کہ آ چہ وانگجاہ ءَ زبھر اَنت، بلکیں ھما نودربرانی جھد ءَ سلام کن ایں کہ آیاں چہ درسیں جنجال ابید ونتگ ءُ مرچی پدریچانی رھشونی ءَ کنگ ءَ اَنت۔
جارکش ءَ گوشتگ کہ بساک اے روچ ءِ درگت ءَ ھمے کول ءَ کنت کہ ما پہ نودربرانی ھک ءُ وانگ ءَ جھد ءَ برجاہ دار ایں۔ مئے مول تچک اِنت پہ جھد، زانشت ءُ اتھاد ءَ اِنت۔
