شال ءَ پہ زور بیگواھیں مردمانی آجوئیءَ وائس پار بلوچ مسنگ پرسن ءِ زھرشانی گدان ءَ 6055 روچ سرجم بوتگ کہ انگت برجاہ اِنت۔ اے میان ءَ جتائیں بھرگاں سیادی داروکیں مردم پہ ھمدردی درشان کنگءَ گدانءَ اتکگ اَنت۔
مرچی زور بیگواھیں مھمد شپا ءُ الاولدین ءِ کھول گدانءَاتکگءُ وتی زور بیگواھیں مردمانی بیگواھی ءِ کیس گل ءِ کر ءَ یاد داشتگ کرتگ ءُ چہ سرکار ءَ پہ وتی آزیزانی آجوئی ءَ لوٹ کرتگ ءُ گوشتگ کہ پہ ڈیھ ءِ کانود ءِ رد ءَ مئے گون ءَ انساپ کنگ بہ بیت۔
مھمد رپیک ءَ گوشتگ کہ منی برات مھمد شپا ء سپر ھان یک پولیس کارمندے ءُ پاری 22 نومبر ءَ ریاستی ادارھاں گوں دگہ سنگتے ءَ ابید اللہ ءَ ھوار چہ مستونگ ءِ شمس آباد جنگل دراھی ءَ آوار جتگ ءُ بیگواہ کرتگ۔ ابید اللہ 31 دسمبر 2025 ءَ یل کنگ بوتگ، بلے مھمد شپا انگت بیگواہ اِنت۔
آئی ءَ گوشتگ کہ ما پہ مھمد شپا ءِ زوریں بیگواھی ءِ بگیری ءَ پہ ایپ آئی آر ءَ تانہ ءَ شتگ ایں بلے ایس ایچ او ءَ ایپ آئی آر نبشتہ نہ کرتگ۔
زوھیب اھمد ءَ گوں گل ءَ گوشتگ کہ منی برات الاوالدین ء ابدلجیل پاکستانی پوج ءَ 25 مئی 2019 ءَ چہ نوشکی ءِ بٹو بازار ءَ آوار جنگ ءَ پد بیگواہ کرتگ۔ ما باز بر ءَ گوں سرکار ءَ رھوت کرتگ ءُ وتی برات ءِ آجوئی ءِ لوٹ کرتگ، نہ منی برات ءِ ایپ آئی آر نبیسگ بوتگ ءُ نہ آئی بابت ءَ مارا سھی کنگ ءَ اَنت۔ چہ ایشی سوب ءَ مئے کھول سکا جنجال اِنت۔
وی بی ایم پی ءِ چیئرمین نسراللہ بلوچ ءَ مھمد شپا ءُ الاولدین ءِ کھول دلجمی داتگ کہ چہ گل ءِ نیمگ ءَ دوئیں ورنایانی کیساں کمیشن ءُ سرکار ءَ دے ایں ءُ پہ آیانی آجوئی ءَ ھمک پورم ءَ توار چست کن ایں۔
نسراللہ بلوچ ءَ گوں سرکار ءَ لوٹ کرتگ کہ پہ مھمد شپا ءُ الاولدین ءِ آجوئی ءَ دلجمی بہ دنت ءُ اگاں آیانی سر ءَ چونیں ھم بھتامے ھست گڑا دیم ءَ آرگ ءُ آمیدگس ءَ پیش کنگ بہ بنت۔
